കൊവിഡ്-19: യൂറോപ്പ് ദുരിതക്കടലില്; രോഗബാധിതര് 10 ലക്ഷത്തിലേക്ക്
ലോകത്താകെ 20.94 ലക്ഷത്തിലേറെ ആളുകള്ക്കാണ് കൊവിഡ്-19 സ്ഥിരീകരിച്ചത്. 135569 പേര് മരിച്ചു. ആകെ രോഗബാധിതരില് പകുതിയും യൂറോപ്പിലാണ്. യൂറോപ്യന് രാജ്യങ്ങളില് മാത്രം 10 ലക്ഷത്തിലേറെ പേര്ക്കാണ് രോഗം സ്ഥിരീകരിച്ചത്.
പത്ത് ദിവസത്തിനിടെ ഇരട്ടിയായി
യൂറോപ്പില് കഴിഞ്ഞ പത്ത് ദിവസത്തിനിടയിലാണ് രോഗികളുടെ എണ്ണം ഇരട്ടിയായതെന്ന് ലോകാരോഗ്യ സംഘടന യൂറോപ്പ് മേഖലാ ഡയറക്ടര് ഹാന്സ് ക്ലജ് പറയുന്നു. യൂറോപ്പ് ഇപ്പോള് ദുരിതക്കടലിലാണെന്നും വരുന്ന ആഴ്ചകള് അതിനിര്ണായകമാണെന്നും ക്ലൂജ് മുന്നറിയിപ്പ് നല്കുന്നു. അടുത്ത ആഴ്ചകളില് യൂറോപ്പിലെ വിവിധ രാജ്യങ്ങളില് രോഗവ്യാപനം രൂക്ഷമാകുമെന്നാണ് ലോകാരോഗ്യ സംഘടന മുന്നറിയിപ്പ് നല്കുന്നത്. വൈറസ് ബാധ ഏറ്റവും രൂക്ഷമായ രാജ്യങ്ങളില് ഏതാനും ദിവസങ്ങളായി കുറഞ്ഞുതുടങ്ങിയിട്ടുണ്ടെന്നത് ആശ്വാസമാണ്. എന്നാല് മറ്റു ചില രാജ്യങ്ങളില് രോഗികളുടെ എണ്ണവും മരണസംഖ്യയും അതിവേഗം ഉയരുകയാണ്. അതിനാല് എല്ലാ രാജ്യങ്ങളും ജാഗ്രത തുടരണമെന്നാണ് ലോകാരോഗ്യ സംഘടന നിര്ദേശിച്ചിരിക്കുന്നത്.
യൂറോപ്പിലെ ആദ്യ പ്രഭവകേന്ദ്രമായി ഇറ്റലി
ചൈനയ്ക്ക് പുറത്ത് വൈറസ് വ്യാപനം ഏറ്റവും രൂക്ഷമായ ആദ്യ രാജ്യമാണ് ഇറ്റലി. യൂറോപ്പില് ആദ്യമായി വൈറസ് അനിയന്ത്രിതമായി പടര്ന്നതും ഇറ്റലിയില് തന്നെ. ഇറ്റലിയില് നിന്ന് യൂറോപ്പിലെ മറ്റു രാജ്യങ്ങളിലേക്കും വൈറസ് അതിവേഗം വ്യാപിക്കുകയായിരുന്നു. ആഴ്ചകള് കൊണ്ടാണ് ഇറ്റലിയില് സ്ഥിതി അതീവ രൂക്ഷമായത്. ഓരോ ദിവസവും മരണനിരക്ക് കുതിച്ചുയരുകയായിരുന്നു. ഒരാഴ്ചയായി ഇറ്റലിയിലും സ്പെയിനിലും മരണസംഖ്യ കുറഞ്ഞുവരികയാണ്. പുതുതായി രോഗം സ്ഥിരീകരിക്കുന്നവരുടെ എണ്ണവും കുറയുന്നുണ്ട്. ഇറ്റലിയില് 21645 പേരാണ് മരിച്ചത്. 165155 പേര്ക്കാണ് രോഗം സ്ഥിരീകരിച്ചത്.
ഇറ്റലിക്ക് പിന്നാലെ സ്പെയിന്
ഇറ്റലിക്ക് ശേഷം യൂറോപ്പില് കൊറോണ വൈറസ് മരണം വിതച്ചത് സ്പെയിനിലാണ്. ഇറ്റലിയില് വലന്സിയ ടീമിന്റെ ഫുട്ബോള് മത്സരം കാണാന് പോയവയരാണ് സ്പെയിനില് രോഗം പടരാന് കാരണമായത്. ഇറ്റലിയിലേക്കാള് വേഗത്തിലായിരുന്നു സ്പെയിന് മരണഭൂമിയായത്. ഓരോ ദിവസവും നൂറുകണക്കിനാളുകള്ക്ക് ജീവന് നഷ്ടമായി. ആയിരക്കണക്കിനാളുകള് രോഗബാധിതരായി. മരണസംഖ്യയില് അമേരിക്കയ്ക്കും ഇറ്റലിക്കും പിന്നില് മൂന്നാം സ്ഥാനത്താണ് സ്പെയിന്. രോഗബാധിതരുടെ എണ്ണത്തില് അമേരിക്കയ്ക്ക് പിന്നില് രണ്ടാം സ്ഥാനത്താണ്. 188816 പേര്ക്കാണ് സ്പെയിനില് രോഗം സ്ഥിരീകരിച്ചത്. 19130 മരണമാണ് ഇതുവരെ റിപ്പോര്ട്ട് ചെയ്തത്. ഒരാഴ്ചയായി മരണവും പുതിയ രോഗികളുടെ എണ്ണവും കുറയാന് തുടങ്ങിയതോടെ സ്പെയിന് നിയന്ത്രണങ്ങള് ഇളവ് വരുത്തിയിട്ടുണ്ട്.
ഫ്രാന്സിലും യുകെയിലും മരണസംഖ്യ കുതിക്കുന്നു
ഇറ്റലിയിലും സ്പെയിനിലും വൈറസിന്റെ ശക്തി കുറയുന്നതോടെ ഫ്രാന്സിലും യുകെയിലുമാണ് കൂടുതല് വഷളാകുന്നത്. ഫ്രാന്സില് ഓരോ ദിവസവും മരണനിരക്ക് റെക്കോര്ഡിലെത്തുകയാണ്. യുകെയിലും നൂറുകണക്കിനാളുകളാണ് ദിവസവും മരിക്കുന്നത്. രോഗബാധിതരുടെ എണ്ണവും കുതിച്ചുയരുകയാണ്. ഫ്രാന്സില് 17167 മരണമാണ് ഇതുവരെ റിപ്പോര്ട്ട് ചെയ്തത്. രോഗബാധിതരുടെ എണ്ണം 147800 കടന്നു. യുകെയില് 98476 പേര്ക്ക് രോഗം സ്ഥിരീകരിച്ചപ്പോള് മരണസംഖ്യ 12868 ആയി.
ജര്മനിയില് കുറയുന്നു; ബെല്ജിയത്തില് കൂടുന്നു
രോഗബാധിതരുടെ എണ്ണം കൂടുതലാണെങ്കിലും യൂറോപ്പില് ഏറ്റവും കുറവ് മരണനിരക്ക് ജര്മനിയിലാണ്. ഏതാനും ദിവസമായി പ്രതിദിന മരണനിരക്ക് ഉയര്ന്നിരുന്നെങ്കിലും ഇപ്പോള് കുറഞ്ഞു. പുതുതായി രോഗം സ്ഥിരീകരിക്കുന്നവരുടെ എണ്ണവും കുറഞ്ഞിട്ടുണ്ട്. രാജ്യത്ത് പരിശോധനകള് വ്യാപമാക്കിയതിനെ തുടര്ന്ന് ജര്മനയില് രോഗികളുടെ എണ്ണം അതിവേഗം വര്ധിച്ചിരുന്നു. 134753 പേര്ക്കാണ് രോഗം സ്ഥിരീകരിച്ചത്. അതേസമയം, ബെല്ജിയമാണ് യൂറോപ്പിലെ പുതിയ മരണകേന്ദ്രമായി മാറുന്നത്. കഴിഞ്ഞ 24 മണിക്കൂറില് 417 മരണമാണ് ബെല്ജിയത്തില് റിപ്പോര്ട്ട് ചെയ്തത്. ഇതോടെ മരണസംഖ്യ 4857 ആയി. ഏതാനും ദിവസമായി ബെല്ജിയത്തില് നൂറുകണക്കിനാളുകളാണ് മരിക്കുന്നത്. 1236 പേര്ക്ക് കൂടി രോഗം സ്ഥിരീകരിച്ചതോടെ ആകെ രോഗികള് 34809 ആയി.