മുന്നറിയിപ്പുകൾ തള്ളി: ഉത്തര കൊറിയ വീണ്ടും മിസൈൽ പരീക്ഷിച്ചു

സോൾ: യുഎൻ രക്ഷാസമിതിയുടെ മുന്നറിയിപ്പ് വകവെക്കാതെ ഉത്തരകൊറിയ വീണ്ടും ബാലിസ്റ്റിക് മിസൈൽ പരീക്ഷിച്ചു. യുഎൻ ഉപരോധം വകവെക്കാതെ പ്യോന്‍ഗ്യാങ്ങില്‍ നിന്നു വിക്ഷേപിച്ച മിസൈൽ ജപ്പാന് മുകളിലൂടെ കടന്നു പോയതായി ജപ്പാൻ ചീഫ് കാബിനറ്റ് സെക്രട്ടറി യോഷിഹിഡെ സുഗ അറിയിച്ചു. ഉത്തരകൊറിയയുടെ തലസ്ഥാനത്തിന് സമീപ പ്രദേശമായ സുനാനിൽ നിന്ന് വിക്ഷേപിച്ച മിസൈൽ ജപ്പാന് സമീപം കടലിൽ പതിച്ചു.

യുഎൻ രക്ഷാസമിതിയുടെ ഉപരോധത്തിന് പിന്നാലെ ജപ്പാനെ കടലിൽ മുക്കുമെന്നും അമേരിക്കയെ ചാരമാക്കുമെന്നും ഉത്തര കൊറിയ ഭീഷണി മുഴക്കിയിരുന്നു. ജപ്പാനിൽ ജനങ്ങളോട് സുരക്ഷിത സ്ഥാനങ്ങളിലേക്ക് മാറാൻ നിർദേശം നൽകിയതായി ചീഫ് കാബിനറ്റ് സെക്രട്ടറി അറിയിച്ചു. യുഎസിന്‍റെ ‘കോഴ വാങ്ങിയ രാജ്യങ്ങൾ’ ആണ് യുഎന്‍ ഉപരോധത്തെ പിന്താങ്ങിയതെന്നും കൊറിയ ആരോപിച്ചിരുന്നു. യുഎസുമായി ഒരു രീതിയിലുമുള്ള ചർച്ചകൾക്ക് തയ്യാറല്ലെന്നും ഉത്തര കൊറിയ വ്യക്തമാക്കി.

പരീക്ഷണ മിസൈൽ 3700 കിലോമീറ്റർ സഞ്ചരിച്ചിട്ടുണ്ടാകുമെന്ന് കൊറിയയുടെ പ്രതിരോധ മന്ത്രാലയം അറിയിച്ചു. കഴിഞ്ഞ മാസം അവസാനവും ജപ്പാന് മുകളിൽ കൂടി ഉത്തരകൊറിയ ബാലിസ് റ്റിക് മിസൈൽ പരീക്ഷണം നടത്തിയിരുന്നു.

Denied warnings: North Korea tested ballistic missile again

North Korea denied UN security agency warning. Korea again tested ballistic missile over Japan, says report