കൊറോണ ഭീതി: അമേരിക്കയില്‍ ദേശീയ അടിയന്തരാവസ്ഥ

വാഷിങ്ടണ്‍: കൊറോണ ഭീതിയുടെ പശ്ചാത്തലത്തില്‍ അമേരിക്കയില്‍ ദേശീയ അടിയന്തരാവസ്ഥ പ്രഖ്യാപിച്ചു. വെള്ളിയാഴ്ച വൈകീട്ട് മൂന്നു മണിയോടെ വൈറ്റ്ഹൗസില്‍ നടത്തിയ വാര്‍ത്താ സമ്മേളനത്തിലാണ് പ്രസിഡന്റ് ഡോണ്‍ഡ് ട്രംപ് അടിയന്തരാവസ്ഥ പ്രഖ്യാപിച്ചത്.


മാത്രമല്ല, വൈറസ് ബാധയെ നേരിടുന്നതിനായി 5000 കോടി യുഎസ് ഡോളര്‍ (3.65 ലക്ഷം കോടി രൂപ) ധനസഹായവും പ്രഖ്യാപിച്ചു. അടിയന്തര പ്രവര്‍ത്തന കേന്ദ്രങ്ങള്‍ ഉടന്‍ സജ്ജമാക്കാന്‍ എല്ലാ സംസ്ഥാനങ്ങളോടും ട്രംപ് ആവശ്യപ്പെടുകയും ചെയ്തു.

Also Read: Live: കൊറോണ വൈറസ് വ്യാപിക്കും; ബാറുകൾ അടച്ചിടണമെന്ന് ഐഎംഎ

'അടുത്ത എട്ടാഴ്ചകള്‍ നിര്‍ണായകമാണ്. നാം കൊറോണ വൈറസിനെ കുറിച്ച് പഠിക്കുകയും അതിനെ അതിജീവിക്കുകയും ചെയ്യും', ട്രംപ് പറഞ്ഞു. അമേരിക്കന്‍ ജനതയ്ക്ക് ആവശ്യമുള്ളതും അവകാശപ്പെട്ടതുമായ പരിചരണം ലഭ്യമാക്കുന്നതിന് വിഘാതം സൃഷ്ടിക്കുന്ന എന്തിനെയും നീക്കം ചെയ്യുമെന്നും ട്രംപ് വ്യക്തമാക്കി. അതേസമയം, കൊറോണ ബാധിച്ച് മരിച്ചവരുടെ എണ്ണം നൂറുകവിഞ്ഞതോടെ സ്‌പെയിനിലും അടിയന്താരവസ്ഥ പ്രഖ്യാപിച്ചു. ശനിയാഴ്ച മുതലാണ് അടിന്തരാവസ്ഥ നിലവില്‍ വരുന്നതെന്ന് പ്രധാനമന്ത്രി പെഡ്രോ സാഞ്ചെസ് പറഞ്ഞു.