ഇറാൻ പിടിച്ചെടുത്ത ബ്രിട്ടീഷ് കപ്പലിൽ 18 ഇന്ത്യക്കാർ

വാഷിങ്ങ്‍ടൺ: ഇറാൻ പിടിച്ചെടുത്ത ബ്രിട്ടന്റെ എണ്ണക്കപ്പലിലെ 23 ജീവനക്കാരിൽ 18 പേരും ഇന്ത്യക്കാർ. ഹോർമുസ് കടലിടുക്കിലാണ് കപ്പൽ പിടിച്ചെടുത്തത്. സൗദി അറേബിയയിലേക്ക് പോകുകയായിരുന്ന സ്റ്റെനാ ഇംപേരോ എന്ന കപ്പലാണ് ഇറാൻ പിടിച്ചെടുത്തത്. കപ്പലിൽ മലയാളികളുണ്ടോ എന്ന് വ്യക്തമല്ല.

ഇറാൻ സൈന്യം റെവല്യൂണറി ഗാർഡ് അവരുടെ ഔദ്യോഗിക വെബ്‌സൈറ്റായ സെപാന്യൂസിലാണ് കപ്പൽ പിടിച്ചെടുത്തതായി അറിയിച്ചത്. കപ്പൽ അന്താരാഷ്ട്ര സമുദ്രഗതാഗത ചട്ടങ്ങൾ ലംഘിച്ചുവെന്ന് ഹോർമോസഗൻ തുറമുഖം അറിയിച്ചെന്നും അവരുടെ അപേക്ഷപ്രകാരമാണ് പിടിച്ചെടുത്തതെന്നും വെബ്‌സൈറ്റിൽ വിശദീകരിക്കുന്നു.

ബ്രിട്ടന്റെ പതാക ഘടിപ്പിച്ചിട്ടുണ്ടെങ്കിലും കപ്പൽ സ്വീഡന്റെ ഉടമസ്ഥതയിലാണുള്ളത്. വ്യാഴാഴ്ച ഹോർമുസ് കടലിടുക്കിൽ ഇറാന്റെ ഡ്രോൺ തകർത്തതായി യുഎസ് അവകാശപ്പെട്ടിരുന്നു. തങ്ങളുടെ സൈനിക കപ്പലിന് ഭീഷണിയുയർത്തിയ ഡ്രോണാണ് വെടിവെച്ചത് തകർത്തതെന്ന് യുഎസ് അവകാശപ്പെട്ടിരുന്നു. 'യു.എസ്.എസ്. ബോക്‌സര്‍' എന്ന യുദ്ധക്കപ്പലാണ് വ്യാഴാഴ്ച ഇറാന്റെ ഡ്രോണ്‍ തകര്‍ത്തതെന്ന് പെന്റഗണ്‍ വക്താവ് ജൊനാഥന്‍ ഹോഫ്മാന്‍ അറിയിച്ചിരുന്നു. യുഎസ് - ഇറാൻ ബന്ധം വഷളാക്കുന്നതിന്റെ സൂചനയാകാം ഇതെന്നാണ് നയതന്ത്ര വിദഗ്‌ധരുടെ അഭിപ്രായം.