കൊവിഡ് പ്രതിരോധം: യൂറോപ്പും നോർത്ത് അമേരിക്കയും ഏഷ്യൻ രാജ്യങ്ങളെ കണ്ട് പഠിക്കണമെന്ന് WHO

ജനീവ: യൂറോപ്പും നോർത്ത് അമേരിക്കയും കൊവിഡ് പ്രതിരോധത്തിൽ ഏഷ്യൻ രാജ്യങ്ങളെ പിന്തുടരണമെന്ന് ഡബ്ല്യുഎച്ച്ഒ വിദഗ്ധൻ. കൊവിഡ് പ്രതിരോധ മാർഗങ്ങളും രോഗബാധിതരുമായി സമ്പർക്കത്തിൽ വരുന്നവരെ ക്വാറന്‍റൈൻ ചെയ്യുന്ന രീതിയും പിന്തുടരണമെന്നാണ് ലോകാരോഗ്യ സംഘടനയുടെ എമർജൻസി വിഭാഗം വിദഗ്ധൻ മൈക്ക് റിയാൻ പറഞ്ഞത്.

ലോകാരോഗ്യ സംഘടനയുടെ യൂറോപ്പ്യൻ മേഖലയിൽ കൊവിഡ് കേസുകളിൽ വർധനവ് രേഖപ്പെടുത്തിയതിന് പിന്നാലെയാണ് സംഘടന മുന്നറിയിപ്പുമായെത്തിയത്. റഷ്യയുൾപ്പെടെയുള്ള മേഖലയിൽ കഴിഞ്ഞയാഴ്ച 8,500 മരണങ്ങൾ റിപ്പോർട്ട് ചെയ്തിട്ടുണ്ട്. ചില രാജ്യങ്ങളിൽ രോഗബാധയിൽ അമ്പത് ശതമാനം വർധനവും രേഖപ്പെടുത്തിയിട്ടുണ്ടെന്ന് മൈക്ക് റിയാൻ പറഞ്ഞു.

Also Read: വിസയില്ലാതെ പറക്കാം; ചരിത്രമെഴുതി ഇസ്രയേലും യുഎഇയും, പ്രഖ്യാപനവുമായി നെതന്യാഹു

കഴിഞ്ഞ മാസങ്ങളിൽ ഓസ്ട്രേലിയ, ചൈന, ജപ്പാൻ, ദക്ഷിണ കൊറിയ എന്നിവിടങ്ങളിൽ കൊവിഡ് വ്യാപനം കുറയ്ക്കാൻ സാധിച്ചിരുന്നെന്ന് മൈക്ക് റിയാൻ ചൂണ്ടിക്കാട്ടി. കൊവിഡ് കേസുകൾ കണ്ടെത്തി രോഗബാധിതരെ ഐസോലേറ്റ് ചെയ്യുകയും സമ്പർക്കത്തിലുള്ളവരെ ക്വാറന്‍റൈൻ ചെയ്തതിലൂടെയുമാണ് രോഗവ്യാപനം തടഞ്ഞതെന്നും അദ്ദേഹം വ്യക്തമാക്കി.

ഏഷ്യ, സൗത്ത് ഏഷ്യ, വെസ്റ്റേൺ പസഫിക് മേഖലകളിലെ രാജ്യങ്ങൾ കൊവിഡ് പ്രതിരോധത്തിൽ മികച്ച പ്രവർത്തനമാണ് നടത്തിയതെന്നാണ് താൻ കരുതുന്നതെന്നും അദ്ദേഹം പറഞ്ഞു.

Also Read : വീണ്ടും ലോക്ക് ഡൗൺ പ്രഖ്യാപിച്ച് യൂറോപ്പിലെ ഈ രാജ്യം; കൊവിഡ് ഭീഷണിയിൽ രാജ്യങ്ങൾ

കൊവിഡ്-19 കേസുകളുടെ എണ്ണത്തിൽ വർധനയുണ്ടായതോടെ അയർലൻഡ് രണ്ടാമതും ലോക്ക് ഡൗൺ പ്രഖ്യാപിച്ചെന്ന വാർത്ത പുറത്ത് വന്ന അതേ സാഹചര്യത്തിലാണ് മൈക്ക് റയാന്‍റെ വാക്കുകളും ശ്രദ്ധ നേടുന്നത്. അയർലൻഡിൽ രോഗബാധിതരുടെ എണ്ണം വർധിച്ചതോടെ പ്രധാനമന്ത്രി മൈക്കിൾ മാർട്ടിനാണ് നിർണായക പ്രഖ്യാപനം നടത്തിയത്. ഇതോടെ രണ്ടാമതും ലോക്ക് ഡൗൺ പ്രഖ്യാപിക്കുന്ന ആദ്യ യൂറോപ്പ്യൻ രാജ്യമായി അയർലൻഡ് മാറിയിരിക്കുകയാണ്.