ബ്രിട്ടനിലെ ലെസ്റ്ററില്‍ പൊട്ടിത്തെറി; 6 പേര്‍ക്ക് പരിക്കേറ്റു

ലണ്ടന്‍: ബ്രിട്ടനിലെ ലെസ്റ്ററിലുണ്ടായ വന്‍ പൊട്ടിത്തെറിയിൽ 6 പേര്‍ക്ക് പരിക്കേറ്റു. ഹിങ്ക്‌ലി റോഡിലുള്ള ബഹുനില കെട്ടിടത്തിലായിരുന്നു സ്‌ഫോടനം. ആറ് അഗ്‌നിശമനസേനാ വിഭാഗങ്ങളാണ് ഇവിടെ രക്ഷാപ്രവര്‍ത്തനം നടത്തുന്നത്. പരിക്കേറ്റവരെ സമീപത്തെ ആശുപത്രികളില്‍ പ്രവശിപ്പിച്ചു. ഇവരില്‍ നാലു പേരുടെ നില അതീവ ഗുരുതരമാണെന്ന് ആശുപത്രി അധികൃതര്‍ വ്യക്തമാക്കി. സ്‌ഫോടനം നടന്ന ഹിങ്ക്‌ലി റോഡും സമീപത്തെ മറ്റ് റോഡുകളും പോലീസ് പൂട്ടിയിരിക്കുകയാണ്. സമീപത്തെ കടകൾ പൂർണമായും കത്തിനശിച്ചു.

നടന്നത് ഭീകരാക്രമണമാണെന്ന് സ്ഥിരീകരിക്കാനാകില്ലെന്നും അഗ്‌നിശമനസേനാ വിഭാഗവുമായി ചേര്‍ന്ന് സംയുക്ത അന്വേഷണം നടത്തിയ ശേഷമേ പ്രാഥമിക നിഗമനങ്ങളിൽ എത്താന്‍ കഴിയുകയുള്ളൂവെന്നും പോലീസ് വ്യക്തമാക്കി. മാധ്യമങ്ങളും ജനങ്ങളും സാമൂഹിക മാധ്യമങ്ങളില്‍ കൂടിയും മറ്റും ഊഹാപോഹങ്ങള്‍ പ്രചരിപ്പിക്കരുതെന്നും പോലീസിന്‍റെയും അഗ്‌നിശമനസനാ വിഭാഗത്തിന്‍റെയും നിയന്ത്രണത്തിലാണ് സ്ഥലത്തെ സ്ഥിതിഗതികളെന്നും പോലീസ് അധികൃതര്‍ അറിയിച്ചു.