മാ​പ്പ​പേ​ക്ഷ​യു​മാ​യി ബ്രി​ട്ടീ​ഷ്​ പ​ത്ര​ങ്ങ​ളി​ല്‍ ഫേ​സ്​​ബു​ക്ക്

ലണ്ടന്‍: അഞ്ച് കോടി ഫേസ്ബുക്ക് അക്കൗണ്ടുകള്‍ ദുരുപയോഗം ചെയ്ത സംഭവത്തില്‍ ഫേസ്ബുക്ക് മേധാവി മാര്‍ക്ക് സുക്കര്‍ബര്‍ഗ് പരസ്യമായി മാപ്പ് ചോദിച്ചു. ബ്രിട്ടനിലേയും ലണ്ടനിലേയും വാര്‍ത്താ ദിനപ്പത്രങ്ങളില്‍ പ്രസിദ്ധീകരിച്ച ഫുള്‍പേജ് പരസ്യത്തിലൂടെയാണ് സുക്കര്‍ബര്‍ഗ് മാപ്പ് ചോദിച്ചത്.

'നിങ്ങളുടെ വിവരങ്ങള്‍ സംരക്ഷിക്കാനുള്ള ഉത്തരവാദിത്തം ഞങ്ങള്‍ക്കുണ്ട്. ഞങ്ങള്‍ക്കത് കഴിയുന്നില്ലെങ്കില്‍ നിങ്ങളെ സേവിക്കാന്‍ ഞങ്ങള്‍ക്ക് അര്‍ഹതയില്ല'- പത്രങ്ങളുടെ ബാക്ക് പേജില്‍ നല്‍കിയ പരസ്യത്തിലെ വാചകം ഇതായിരുന്നു. ലണ്ടനിലെ സണ്‍ഡെ ടെലഗ്രാഫ്, സണ്‍ഡേ ടൈംസ്, മെയില്‍ ഓണ്‍ സണ്‍ഡേ, ഒബ്‌സര്‍വര്‍, സണ്‍ഡേ മിറര്‍, സണ്‍ഡേ എക്‌സ്പ്രസ്, യുഎസിലെ ന്യൂയോര്‍ക്ക് ടൈംസ്, വാഷിംഗ്ടണ്‍ പോസ്റ്റ്, വാള്‍സ്ട്രീറ്റ് ജേര്‍ണല്‍ തുടങ്ങിയ പത്രങ്ങളിലാണ് ഫേസ്ബുക്ക് തങ്ങളുടെ പരസ്യം പ്രസിദ്ധീകരിച്ചത്. കേംബ്രിജ് യൂനിവേഴ്സിറ്റി ഗവേഷകന്‍ വികസിപ്പിച്ചെടുത്ത ചോദ്യാവലിയാണ് 2014ല്‍ ലക്ഷക്കണക്കിന് ഫേസ്ബുക്ക് ഉപയോക്താക്കളുടെ രഹസ്യങ്ങള്‍ ചോര്‍ത്തിയതെന്ന് സുക്ക‍ർബ‍ർഗ് വിശദീകരിച്ചു.

ഇത്തരത്തിലുള്ള സംഭവങ്ങള്‍ ആവര്‍ത്തിക്കാതിരിക്കുമെന്ന് സുക്കര്‍ബര്‍ഗ് പരസ്യത്തിലൂടെ ഉറപ്പ് നല്‍കുന്നു. ഫേസ്ബുക്കിനെ വിശ്വസിച്ചതിന് നിങ്ങള്‍ക്ക് നന്ദി, ഇതിലും മികച്ച സേവനങ്ങള്‍ നിങ്ങള്‍ക്ക് നല്‍കുമെന്ന് ഉറപ്പുനല്‍കുന്നു- സുക്കര്‍ബര്‍ഗിന്റെ സന്ദേശം ഇങ്ങനെ തുടരുന്നു. ബ്രിട്ടന്‍ ആസ്ഥാനമായുള്ള കേംബ്രിജ് അനലിറ്റിക്കക്കുവേണ്ടി അലക്സാണ്ടര്‍ കോഗന്‍ എന്ന ഗവേഷകന്‍ നിര്‍മിച്ച ആപ് വഴിയാണ് കോടിക്കണക്കിന് ഫേസ്ബുക്ക് ഉപഭോക്താക്കളുടെ വിവരങ്ങള്‍ ചോര്‍ത്തിയത്. റിപ്പോര്‍ട്ടുകള്‍ പുറത്തുവന്നതോടെ ഫേസ്ബുക്കിെന്‍റ ഒാഹരികള്‍ വ്യാപകമായി ഇടിഞ്ഞിരുന്നു.