വെള്ളത്തിലായി യുഎഇ
രണ്ട് ദിവസമായി തുടരുന്ന കനത്ത മഴയില്‍ യുഎഇയിലെ പലയിടങ്ങളും വെള്ളത്തിലായി. റോഡുകളില്‍ വെള്ളം കയറിയതിനെ തുടര്‍ന്ന് പലയിടത്തും ഗതാഗതം തടസ്സപ്പെട്ടിരിക്കുയാണ്. റാസല്‍ഖൈമയില്‍ അല്‍ ഫിലായ, വാദി നഖബ്, അല്‍ ഫഹ്‍ലീന്‍ തുടങ്ങിയ സ്ഥലങ്ങളിലേക്കുള്ള റോഡുകള്‍ ഭാഗികമായി അടച്ചിരിക്കുകയാണ്. അല്‍ ഫഹ്‍ലീനിലാണ് മഴ ഏറ്റവും ശക്തമായിരിക്കുന്നത്. ഞായറാഴ്‍ചയും മഴ ശക്തമാകുമെന്ന മുന്നറിയിപ്പുള്ളതിനാല്‍ റാസല്‍ഖൈമ പോലീസ് ജാഗ്രതാ നിര്‍ദേശം നല്‍കിയിട്ടുണ്ട്. അല്‍ ഷുഹദ റോഡ്, ജബെല്‍ ജയ്‍സ് റോഡ് അല്‍ ഖറന്‍ ബ്രിഡ്‍ജ് എന്നിവയെല്ലാം പൂര്‍ണമായി അടച്ചിരിക്കുകയാണ്.
വീട്ടുമതില്‍ ഇടിഞ്ഞുവീണ് ജോലിക്കാരി മരിച്ചു
കനത്ത മഴയില്‍ വീടില്‍ മതില്‍ ഇടിഞ്ഞുവീണാണ് സ്ത്രീ മരിച്ചത്. രണ്ട് ദിവസമായ മഴ തുടരുന്ന റാസല്‍ഖൈമയിലൈണ് സംഭവം. റാസല്‍ഖൈമയിലെ അല്‍ ഫഹ്‍ലീമിലെ ഒരു വീട്ടില്‍ ജോലി ചെയ്‍തിരുന്ന ആഫ്രിക്കക്കാരിയാണ് മരിച്ചത്. ഈ വീടിനും കേട് പറ്റിയിട്ടുണ്ട്. ഈ പ്രദേശത്ത് നിരവധി വീടുകള്‍ക്ക് മഴയില്‍ നാശമുണ്ടായിട്ടുണ്ടെന്ന് റാസല്‍ഖൈമ പോലീസ് അറിയിച്ചു. വാദി ഷാമില്‍ ഒരു ഏഷ്യന്‍ തൊഴിലാളിയെ വെള്ളപ്പൊക്കത്തില്‍ കാണാതായിട്ടുണ്ട്. ഇയാള്‍ക്കായി തിരച്ചില്‍ ആരംഭിച്ചതായി റാസല്‍ഖൈമ പോലീസ് പറഞ്ഞു.
സ്‍കൂളുകള്‍ക്ക് അവധി, പരീക്ഷകള്‍ മാറ്റി
കനത്ത മഴ തുടരുന്നതിനാല്‍ യുഎഇയിലെ മിക്ക സ്‍കൂളുകള്‍ക്കും ഞായറാഴ്‍ച അവധി നല്‍കി. മോശം കാലാവസ്ഥ തുടരുന്നതിനാല്‍ മിക്ക സ്‍കൂളുകളും പരീക്ഷകളും മാറ്റിവെച്ചിരിക്കുകയാണ്. മഴയില്‍ ചില സ്‍കൂള്‍ കെട്ടിടങ്ങള്‍ക്ക് കേട് പറ്റിയിട്ടുമുണ്ട്. പരീക്ഷകള്‍ മാറ്റിവെച്ചതായി സ്‍കൂള്‍ അധികൃതര്‍ രക്ഷിതാക്കള്‍ക്ക് അറിയിപ്പ് നല്‍കിയിട്ടുണ്ട്.
വിമാന സര്‍വീസുകള്‍ വൈകി
കനത്ത മഴയെ തുടര്‍ന്ന് ദുബായ് അന്താരാഷ്ട്ര വിമാനത്താവളത്തില്‍ വെള്ളം കയറി. വിമാന സര്‍വീസുകള്‍ വൈകുന്നതായും ചില സര്‍വീസുകള്‍ റദ്ദാക്കിയതായും ദുബായ് വിമാനത്താവള അധികൃതര്‍ അറിയിച്ചു. ശനിയാഴ്‍ച ദുബായ് വിമാനത്താവളത്തില്‍ നിന്നുള്ള എല്ലാ സര്‍വീസുകളും വൈകുകയോ റദ്ദാക്കുകയോ ചെയ്‍തിരുന്നു. ചില സര്‍വീസുകള്‍ സമീപത്തെ അല്‍ മക്തൂം വിമാനത്താവളത്തിലേക്ക് മാറ്റിയിട്ടുണ്ടെന്നും ദുബായ് വിമാനത്താള അധികൃതര്‍ ട്വിറ്ററിലൂടെ അറിയിച്ചു.
മഴയ്‍ക്കൊപ്പം ഇടിമിന്നലും കാറ്റും
യുഎയില്‍ പലയിടത്തും ഞായറാഴ്‍ച രാവിലെ മുതല്‍ കനത്ത മഴയ്‍ക്കൊപ്പം ശക്തമായ കാറ്റും ഇടിമിന്നലുമുണ്ടായി. ഷാര്‍ജയിലാണ് ശക്തമായ ഇടിമിന്നലുണ്ടായത്. അബുദാബിയിലും ദുബായിലും ശക്തമായ കാറ്റും നേരിയ ഇടിമിന്നലുമുണ്ടായിരുന്നു. അബുദാബി വിമാനത്താളത്തിലും മഴ പെയ്യുന്നുണ്ട്.
അറേബ്യന്‍ ഗള്‍ഫില്‍ മഴമേഘങ്ങള്‍
അറേബ്യന്‍ ഗള്‍ഫില്‍ മഴമേഘങ്ങള്‍ ഉരുണ്ടുകൂടിയിട്ടുണ്ടെന്നും മഴ ശക്തമായി തുടരുമെന്നുമാണ് കാലാവസ്ഥാ വിഭാഗം നല്‍കുന്ന മുന്നറിയിപ്പ്. അബുദാബിയിലും ഷാര്‍ജയിലും ശക്തമായ മഴയും കാറ്റുമുണ്ടാകും. അബുദാബിയില്‍ താപനില 21 ഡിഗ്രി സെല്‍ഷ്യസ് വരെയാകുമെന്നാണ് പ്രവചനം. ദുബായില്‍ 21 ഡിഗ്രി സെല്‍ഷ്യസായിരിക്കും ഞായറാഴ്‍ചത്തെ താപനില. മലയോരങ്ങളില്‍ താപനില കുറയുന്നത് മഞ്ഞുവീഴ്‍ചയ്ക്ക് കാരണമാകുമന്നും മുന്നറിയിപ്പുണ്ട്. അറേബ്യന്‍ ഗള്‍ഫ് മാത്രമല്ല ഒമാന്‍ കടലും പ്രക്ഷുബ്‍ധമാണ്.