തോല്‍വി വേദനാജനകമെന്ന് ഹിലറി ക്ലിന്റൺ

ന്യൂയോര്‍ക്ക് • തോല്‍വി അപ്രതീക്ഷിതവും വേദനാജനകവുമാണ്. തുറന്ന മനസ്സോടെ പുതിയ യുഎസ് പ്രസിഡന്റ് ഡോണള്‍ഡ് ട്രംപിനെ സ്വീകരിക്കണമെന്നും ഹിലറി ക്ലിന്റൺ. യുഎസ് പ്രസിഡന്റ് തിരഞ്ഞെടുപ്പിലെ തോല്‍വിക്ക് ശേഷം ന്യൂയോര്‍ക്കില്‍ അനുയായികളോട് സംസാരിക്കുകയായിരുന്നു അവര്‍.

ട്രംപ് എല്ലാ അമേരിക്കക്കാര്‍ക്കും വേണ്ടി പ്രവര്‍ത്തിക്കുമെന്നാണ് പ്രതീക്ഷയെന്നും അവര്‍ പറ‍ഞ്ഞു.
തിരഞ്ഞെടുപ്പില്‍ മല്‍സരിക്കാന്‍ കഴി‍ഞ്ഞതില്‍ അഭിമാനമുണ്ട്. ജീവിതത്തിലെ ഏറ്റവും വലിയ ആദരവുകളിലൊന്നാണ് അത്. ഡോണള്‍ഡ് ട്രംപിന് എല്ലാ ആശംസകളും നേരുന്നുവെന്നും ഹിലറി കൂട്ടിച്ചേര്‍ത്തു. അമേരിക്കയെ കൂടുതല്‍ ശക്തവും മികച്ചതുമാക്കാന്‍ ജനങ്ങള്‍ ശ്രമിക്കണം.

ഒരു വനിത അമേരിക്കന്‍ പ്രസിഡന്റാകുന്ന കാലം വിദൂരമല്ല. ശരിക്കുവേണ്ടിയുള്ള പോരാട്ടം യുവാക്കള്‍ അവസാനിപ്പിക്കരുത്. നമ്മള്‍ ഉയര്‍ത്തിയ മുദ്രാവാക്യങ്ങള്‍ ഒരു വ്യക്തിയെ ഉദ്ദേശിച്ചോ ഒരു തിരഞ്ഞെടുപ്പിനെ മാത്രം ഉദ്ദേശിച്ചോ അല്ലെന്നും ഹിലറി കൂട്ടിച്ചേ‍ർത്തു.