ജൂനിയസ് ഹോ ഉള്‍പ്പെടെ ചൈനീസ് പക്ഷത്തെ പ്രമുഖര്‍ വീണു
ചൈനയുടെ നയങ്ങളെയും കണ്‍സര്‍വേറ്റീവ് സോഷ്യലിസത്തെയും പിന്തുണയ്ക്കുന്ന ഹോങ്കോങ് ഫെഡറേഷന്‍ ഓഫ് ട്രേഡ് യൂണിയന്‍സിന് (എഫ് ടിയു) കനത്ത തിരിച്ചടിയാണ് ഇത്തവണ തിരഞ്ഞെടുപ്പില് നേരിട്ടത്. ചൈനയെ ശക്തമായി പിന്തുണയ്ക്കുന്ന ജൂനിയസ് ഹോ ഉള്‍പ്പെടെയുള്ള പ്രമുഖരാണ് പരാജയപ്പെട്ടത്. ചൈനയെ പിന്തുണയ്ക്കുന്ന നേതാക്കളില്‍ ഏറ്റവും പ്രമുഖനായ ജൂനിയസ് ഹോ പ്രക്ഷോഭകര്‍ക്കെതിരെ പരസ്യമായി നിലപാടെടുത്തിട്ടുണ്ട്. കൂടാതെ വിവാദങ്ങളുടെ തോഴനുമാണ്. കഴിഞ്ഞ മാസം ജൂനിയസ് ഹോ തെരുവില്‍ കുത്തേറ്റ് വീണിരുന്നു.
ഇപ്പോള്‍ ഞങ്ങളുടെ ശബ്‍ദം വ്യക്തമാണ്: ജോഷ്വാ വോങ്
ഇത് ചരിത്രവിജയമാണെന്നാണ് പ്രമുഖ ഡെമോക്രാറ്റ് നേതാവ് ജോഷ്വാ വിങ് തിരഞ്ഞെടുപ്പ് ഫലം വന്ന ശേഷം പ്രതികരിച്ചത്. ''പ്രതിപക്ഷ പാര്‍ട്ടികള്‍ ഗംഭീര വിജയമാണ് നേടിയിരിക്കുന്നത്. ഹോങ്കോങ് ജനത ഉറക്കെ പ്രതികരിച്ചിരിക്കുന്നു. ഇപ്പോള്‍ ഞങ്ങളുടെ ശബ്‍ദം വ്യക്തമാണ്.'' -ജോഷ്വാ വോങ് ട്വീറ്റ് ചെയ്‍തു. ആറുമാസമായി തുടരുന്ന പ്രക്ഷോഭം പൊതുജനങ്ങള്‍ക്ക് എതിരല്ലെന്ന് ഇപ്പോള്‍ അന്താരാഷ്ട്ര സമൂഹത്തിനും ബോധ്യമായിരിക്കുമെന്നും ജോഷ്വാ വോങ് പറഞ്ഞു. ഇത്തവണത്തെ തിരഞ്ഞെടുപ്പില് മത്സരിക്കുന്നതില്‍ നിന്ന് വിലക്കപ്പെട്ട ഒരേയൊരു നേതാവാണ് ജോഷ്വാ വോങ്.