ലാഹോര്: ന്യൂനപക്ഷങ്ങളെ ലക്ഷ്യമിട്ട് പാകിസ്ഥാനില് ചൈന കല്യാണം വ്യാപിക്കുന്നതായി റിപ്പോര്ട്ട്. ചൈനക്കാരായ പുരുഷന്മാരുടെ ഭാര്യമാരാകാന് വേണ്ടി നൂറുകണക്കിന് പെണ്കുട്ടികളെ വില്പന നടത്തിയതായാണ് ഞെട്ടിക്കുന്ന റിപ്പോര്ട്ട്. 629 പെണ്കുട്ടികളെ കടത്തിയതായി അസോസിയേറ്റഡ് പ്രസ് പുറത്തുവിട്ട റിപ്പോര്ട്ടില് പറയുന്നു.
പാകിസ്ഥാനിലെ മാധ്യമപ്രവര്ത്തകരുടെ സഹായത്തോടെയാണ് അസോസിയേറ്റഡ് പ്രസ് അന്വേഷണം നടത്തിയത്. 2018 മുതല് നടത്തിയ മനുഷ്യക്കടത്തിന്റെ വിവരങ്ങളാണ് റിപ്പോര്ട്ടിലുള്ളത്. വിവാഹത്തിനെന്ന് പറഞ്ഞ് ചൈനയിലേക്ക് കടത്തപ്പെട്ട പെണ്കുട്ടികളുടെ വിവരങ്ങള് റിപ്പോര്ട്ടിലുണ്ട്.
Also Read അമേരിക്കയ്ക്കുള്ള 'ക്രിസ്മസ് സമ്മാനം' ഒരുങ്ങുന്നു? മഞ്ഞുമലയില് കിം ജോങ് ഉന്നിന്റെ അശ്വമേധം
ചൈനയിലേക്ക് മനുഷ്യക്കടത്ത് നടക്കുന്നതായുള്ള റിപ്പോര്ട്ടുകളെ തുടര്ന്ന് പാകിസ്ഥാന് അന്വേഷണം തുടങ്ങിയിരുന്നു. എന്നാല് ചൈനയുമായുള്ള ബന്ധത്തില് വിള്ളല് വരുമെന്ന് ഭയന്ന് കഴിഞ്ഞ ജൂണില് അന്വേഷണം നിര്ത്തി. ജൂണിന് മുമ്പ് അന്വേഷണ ഉദ്യോഗസ്ഥര് ശേഖരിച്ച വിവരങ്ങളാണ് അസോസിയേറ്റഡ് പ്രസ് പുറത്തുവിട്ടിരിക്കുന്നത്.
മനുഷ്യക്കടത്ത് വാര്ത്തകള് റിപ്പോര്ട്ട് ചെയ്യുന്നതിന് പാക് മാധ്യമങ്ങള്ക്ക് നിയന്ത്രണമുണ്ട്. രണ്ട് രാജ്യങ്ങളിലെയും പൗരന്മാര് പരസ്പരം വിവാഹം ചെയ്യുന്നതിനെ ചൈനയും പാകിസ്ഥാനും പ്രോത്സാഹിപ്പിക്കുന്നുണ്ട്. എന്നാല് മനുഷ്യക്കടത്തിന് ഇരു രാജ്യങ്ങളും എതിരാണ്.
മനുഷ്യക്കടത്ത് നടത്തുന്നവര് പിടിക്കപ്പെട്ടാലും പലപ്പോഴും ശിക്ഷിക്കപ്പെടാറില്ല. ശക്തരായ മാഫിയകളാണ് ഇതിന് പിന്നില് പ്രവര്ത്തിക്കുന്നത്. അതിനാല് അവര് സ്വാധീനം ഉപയോഗിച്ച് കേസ് ഇല്ലാതാക്കുന്നു.
Also Read ചൈന-യുഎസ് പോര് മുറുകുന്നു: ഹോങ്കോങ്ങിന് പിന്നാലെ ഉയിഗുര് മുസ്ലിങ്ങള്ക്ക് വേണ്ടിയും യുഎസ് നിയമം
കഴിഞ്ഞ ഒക്ടോബറിലാണ് ഏറ്റവും വലിയ മനുഷ്യക്കടത്ത് കേസ് രജിസ്റ്റര് ചെയ്തത്. കേസില് 31 ചൈനീസ് പൗരന്മാരെ ഫൈസാബാദ് കോടതി വെറുതെ വിടുകയായിരുന്നു. മനുഷ്യക്കടത്തിന് ഇരയായ സ്ത്രീകളൊന്നും കോടതിയില് സത്യം പറയാത്തതിനാലാണ് കേസ് തള്ളിപ്പോയത്. പണം നല്കിയും ഭീഷണിപ്പെടുത്തിയുമാണ് മനുഷ്യക്കടത്ത് മാഫിയ സ്ത്രീകളെ നിശബ്ദരാക്കുന്നത്.
പാകിസ്ഥാനിലെ ന്യൂനപക്ഷ വിഭാഗമായ ക്രിസ്ത്യന് പെണ്കുട്ടികളെയാണ് കൂടുതലും വിവാഹ മാഫിയകള് ലക്ഷ്യമിടുന്നതെന്നാണ് റിപ്പോര്ട്ട്. ചൈനയിലേക്ക് കടത്തപ്പെടുന്ന പെണ്കുട്ടികള് പിന്നീട് തടവിലാക്കപ്പെടുകയോ വേശ്യവൃത്തിയിലേക്കെത്തുകയോ ആണ് ചെയ്യുന്നത്. ചിലര് ക്രൂരമായ പീഡനമേറ്റ് വിടുകളില് തടവിലാക്കപ്പെടുകയും ചെയ്യുന്നു. ചിലര് സഹിക്കവയ്യാതെ രക്ഷപ്പെടാന് ശ്രമിക്കുമ്പോഴാണ് വിവരങ്ങള് പുറത്തുവരുന്നത്.
ചൈന-പാകിസ്ഥാന് വിവാഹങ്ങള് നടത്താന് രണ്ട് രാജ്യത്തും ഇടനിലക്കാരുണ്ട്. 40 ലക്ഷം മുതല് ഒരു കോടി രൂപ വരെയാണ് ചൈനീസ് വരനില് നിന്ന് ഇടനിലക്കാര് വാങ്ങുന്നത്. വരന്റെ കൈയില് നിന്ന് വാങ്ങുന്നതിന്റെ പകുതി മാത്രമാണ് പലപ്പോഴും പെണ്കുട്ടികളുടെ കുടുംബത്തിന് നല്കുന്നത്.
ചൈനയുമായുള്ള അടുപ്പത്തിന്റെ പേരില് സ്വന്തം പൗകന്മാരുടെ മനുഷ്യാവാശലംഘനങ്ങളോട് പാകിസ്ഥാന് കണ്ണടയ്ക്കുകയാണെന്ന് ആംനസ്റ്റി ഇന്റര്നാഷണല് സൗത്ത് ഏഷ്യ കാമ്പെയിന് ഡയരക്ടര് ഒമര് വാറിയ പറഞ്ഞു.