പുതിയ തിളക്കമാർന്ന കോൺഗ്രസിനെ സമ്മാനിക്കുമെന്ന് രാഹുൽ ഗാന്ധി

മനാമ: ​ മാസങ്ങൾക്കകം ​ പുതിയ തിളക്കമാർന്ന കോൺഗ്രസിനെ സമ്മാനിക്കാനാകുമെന്നും 2019ലെ തെരഞ്ഞെടുപ്പിൽ കോൺഗ്രസ് ബിജെപിയെ തരിപ്പണമാക്കുമെന്നും കോൺഗ്രസ് അധ്യക്ഷൻ രാഹുൽ ഗാന്ധി. ​ രാജ്യത്ത് പുതിയ തൊഴിലവസരങ്ങൾ സൃഷ്ടിക്കപ്പെടുന്നില്ലെന്നും തൊഴിലവസരങ്ങളുടെ കാര്യത്തിൽ ഇപ്പോൾ എട്ടുവർഷത്തിനിടയിലെ ഏറ്റവും കുറഞ്ഞനിരക്കാണ് ഉള്ളതെന്നും രാഹുൽ ചൂണ്ടിക്കാട്ടി. ഇതിന്‍റെ പൂര്‍ണ ഉത്തരവാദി കേന്ദ്ര സർക്കാരാണെന്നും അദ്ദേഹം പറഞ്ഞു. ബഹ്റിൻ സന്ദര്‍ശനത്തിനെത്തിയ രാഹുൽ അവിടുത്തെ ഇന്ത്യൻ വംശജരെ അഭിസംബോധന ചെയ്തു സംസാരിക്കവേയാണ് ഇക്കാര്യങ്ങൾ വ്യക്തമാക്കിയത്. കോൺഗ്രസ്​ അധ്യക്ഷനായി തെരഞ്ഞെടുക്കപ്പെട്ടതിന് ശേഷമുള്ള, രാഹുലിന്‍റെ ആദ്യ വിദേശ സന്ദർശനമാണിത്.

രാജ്യം ഇപ്പോൾ ചർച്ച ചെയ്യുന്നത് തൊഴിലവസരങ്ങൾ, ആരോഗ്യം, വിദ്യാഭ്യാസം എന്നിവയെക്കുറിച്ചൊന്നുമല്ല, എന്ത് കഴിക്കണം, എന്തിന് പ്രതിഷേധിക്കണം, എന്ത് പറയാം അല്ലെങ്കിൽ പറയാതിരിക്കാം എന്നതിലേക്കൊക്കെ അത്തരം ചര്‍ച്ചകൾ ചുരുങ്ങിയെന്നും അദ്ദേഹം കുറ്റപ്പെടുത്തി. രാജ്യത്തെ ജനങ്ങൾക്ക് തൊഴിൽ നൽകാനാവാത്തത് ആ രാജ്യം ഭരിക്കുന്ന സർക്കാരിന്‍റെ പിടിപ്പുകേടാണെന്ന് രാഹുൽ ചൂണ്ടിക്കാട്ടി. ചൈന‍യിൽ 24 മണിക്കൂറിൽ 50,000 തൊഴിലവസരങ്ങളാണ് സൃഷ്ടിക്കപ്പെടുന്നതെന്നും ഇന്ത്യയിൽ ഇത് 400 എണ്ണം മാത്രമാണെന്നും അദ്ദേഹം വ്യക്തമാക്കി. ഈ മാസം ഒൻപത് വരെ രാഹുൽ ബഹ്റിനിൽ തുടരും.