ന്യൂഡല്ഹി: ചൈനയുമായുള്ള സംഘര്ഷം തുടരുന്നതിനിടെ അന്താരാഷ്ട്ര സഹകരണം ശക്തിപ്പെടുത്താന് ഇന്ത്യ. ഇന്ത്യ-ജപ്പാന് ഉച്ചകോടി ഒക്ടോബറില് നടക്കുമെന്ന് സൂചന. ഇന്ത്യന് പ്രധാനമന്ത്രി നരേന്ദ്ര മോദിയും ജപ്പാന് പ്രധാനമന്ത്രി ഷിന്സോ ആബെയും തമ്മിലുള്ള വാര്ഷിക കൂടിക്കാഴ്ചയുടെ തീയ്യതി തീരുമാനിക്കുന്നതിനായി ഇരു രാജ്യങ്ങളും ചര്ച്ചകള് തുടങ്ങി.
Also Read: ദക്ഷിണ ചൈന കടല് ആരുടേത്?
അതിര്ത്തിയില് ചൈന സൃഷ്ടിക്കുന്ന സംഘര്ഷങ്ങളും ഈസ്റ്റ് ചൈന കടലിലെ തര്ക്കങ്ങളും ഉച്ചകോടിയില് ഇന്ത്യ-ജപ്പാന് പ്രധാനമന്ത്രിമാര് ചര്ച്ച ചെയ്തേക്കും. ഇന്ത്യന് അതിര്ത്തിയില് കിഴക്കന് ലഡാഖില് ചൈന നടത്തുന്ന കൈയേറ്റങ്ങള് സംഘര്ഷം രൂക്ഷമാക്കിയിരിക്കുകയാണ്. കിഴക്കന് ചൈന കടലിലെ സെന്കാകു ദ്വീപിനുമേലുള്ള ജപ്പാന്-ചൈന അവകാശത്തര്ക്കവും രൂക്ഷമാണ്.
മോദി-ആബെ ഉച്ചകോടി കഴിഞ്ഞ ഡിസംബറില് ഗുവാഹത്തിയില് നടത്താനാണ് ആദ്യം തീരുമാനിച്ചിരുന്നത്. പൗരത്വ നിയമ ഭേദഗതിക്കെതിരെ അസമില് പ്രതിഷേധം ശക്തമായതോടെ ഉച്ചകോടി മാറ്റിവെക്കുകയായിരുന്നു. പിന്നീട് ചൈനയില് നിന്ന് തുടങ്ങിയ കൊറോണ വൈറസ് ബാധ ലോകം മുഴുവന് വ്യാപിച്ചതോടെ പുതിയ തീയ്യതി തീരുമാനിക്കുന്നത് നീണ്ടുപോയി.
Also Read: നാല് ദിവസം കൊണ്ട് 10 ലക്ഷം രോഗികള്
ലോകം മുഴുവന് കൊവിഡ്-19 മഹാമാരിയുടെ പിടിയിലായപ്പോള് ചൈനീസ് പ്രസിഡന്റ് ഷി ജിന്പിങ് സാമ്രാജ്യം വലുതാക്കാനുള്ള നീക്കങ്ങളാണ് നടത്തുന്നത്. ഇന്ത്യന് അതിര്ത്തിയിലെ കടന്നുകയറ്റവും ദക്ഷിണ ചൈന കടലിലെ അവകാശവാദങ്ങളും ചൈന തുടര്ന്നു. ഇന്ത്യന് അതിര്ത്തിയിലെ നിയന്ത്രണരേഖയില് നിന്ന് ചര്ച്ചകള്ക്ക് ശേഷം ചൈനീസ് സേന പിന്മാറ്റം തുടങ്ങി.
ദക്ഷിണ ചൈന കടലിലും കിഴക്കന് ചൈന കടലിലും ചൈന സംഘര്ഷം സൃഷ്ടിക്കുന്നതില് ജപ്പാന് ആശങ്ക പ്രകടിപ്പിച്ചിട്ടുണ്ട്. മേഖലയില് നിലവിലുള്ള സ്ഥിതിയില് മാറ്റം വരുത്താനാണ് ചൈനയുടെ ശ്രമമെന്ന് ജപ്പാന് ആരോപിച്ചു.
Also Read: മഹാപ്രളയത്തില് വിറങ്ങലിച്ച് ചൈന
ഇന്തോ-പസിഫിക് മേഖലയിലെ രാജ്യങ്ങളുടെ ഐക്യത്തിനായുള്ള പ്രവര്ത്തനങ്ങള്ക്ക് ജപ്പാന് നേതൃത്വം വഹിക്കുന്നുണ്ട്. യുഎസ്, ജപ്പാന്, ഇന്ത്യ, ഓസ്ട്രേലിയ എന്നീ രാജ്യങ്ങളാണ് മേഖലയില് സഹകരിക്കുന്നത്. മറ്റു രാജ്യങ്ങളെയും ഉള്പ്പെടുത്താനുള്ള ശ്രമമാണ് നടത്തുന്നത്.
ഇന്ത്യയുടെയും ജപ്പാന്റെയും സൈന്യങ്ങള്ക്ക് പരസ്പരം സൈനിക കേന്ദ്രങ്ങള് ഉപയോഗിക്കാനുള്ള അനുമതി നല്കുന്നതും മോദിയും ആബെയും ചര്ച്ച ചെയ്യും. പ്രതിരോധ കരാറുകള്ക്കും സാധ്യതയുണ്ട്.
Also Read: കൊവിഡ് മരണം ആറ് ലക്ഷത്തിലേക്ക്
ജപ്പാനുമായുള്ള കൂടിക്കാഴ്ചയ്ക്ക് ശേഷം ഫിലിപ്പീന്സ് പ്രധാനമന്ത്രി റോഡ്രിഗോ ഡ്യുട്ടെര്ട്ടുമായും മോദി ചര്ച്ച നടത്തിയേക്കും. ഡ്യുട്ടെര്ട്ട് കഴിഞ്ഞ മാര്ച്ചില് ഇന്ത്യ സന്ദര്ശിക്കേണ്ടതായിരുന്നു. കൊറോണ വൈറസ് വ്യാപനത്തെ തുടര്ന്നാണ് മാറ്റിവെച്ചത്.