ഇറാഖിലെ യുഎസ് എയർബേസുകളിൽ ഇറാൻ ആക്രമണം, തിരിച്ചടിയ്ക്കുമെന്ന് യുഎസ്, യുദ്ധത്തിലേക്ക്

തെഹ്റാൻ: ജനറൽ ഖാസിം സുലൈമാനിയുടെ കൊലയ്ക്ക് പകരം ചോദിച്ചു കൊണ്ട് ഇറാൻ ഇറാഖിലുള്ള യുഎസ് എയർ ബേസുകളിൽ ആക്രമണം നടത്തി. ആക്രമണം നടത്തിയത് ഇറാന്റെ ഇസ്ലാമിക് റവല്യൂഷൻ ഗാർഡ്സ് കോർപ്സ് (ഐആർജിസി) ആണെന്ന് ഔദ്യോഗികമായി സ്ഥിരീകരിച്ചിട്ടുണ്ട്. ഭൂതല മിസൈലുകൾ ഉപയോഗിച്ചാണ് ആക്രമണം നടത്തിയിട്ടുള്ളത്.



Also Read: വിലാപയാത്രയ്ക്കിടെ ദുരന്തരം: ഖാസിം സുലൈമാനിയുടെ കബറടക്കം മാറ്റിവെച്ചു

പശ്ചിമേഷ്യയിൽ നിന്നും യുഎസ് സൈന്യം പിൻവാങ്ങണമെന്ന് ഇറാൻ നേരത്തെ ആവശ്യപ്പെട്ടിരുന്നു. സൈനികരുടെ ജീവൻ രക്ഷിക്കണമെങ്കിൽ ഇറാഖിലുള്ള യുഎസ് സേനയെ തിരിച്ചു വിളിക്കണമെന്ന നിലപാടാണ് പടിഞ്ഞാറൻ ഇറാഖിലെ അൻബാർ പ്രവിശ്യയുടെ ഭാഗമായ അൽ ആസാദ് എയർബേസിൽ നടത്തിയ ആക്രമണത്തിലൂടെ ഐആർജിസി വ്യക്തമാക്കിയിട്ടുള്ളത്.


ആക്രമണത്തിന് ചുട്ടമറുപടി നൽകുമെന്ന് പെന്റഗൺ കേന്ദ്രങ്ങൾ അറിയിച്ചു. ''രണ്ട് സൈനിക താവളങ്ങളിലുമായി 12ൽ അധികം മിസൈലുകളാണ് പതിച്ചിട്ടുള്ളത്. ഈ മിസൈലുകളെല്ലാം വന്നിട്ടുള്ളത് ഇറാനിൽ നിന്നു തന്നെയാണ്. ആളപായമുണ്ടോയെന്ന കാര്യത്തിൽ ഇതുവരെ സ്ഥിരീകരണമായിട്ടില്ല. കൂടുതൽ വിവരങ്ങൾ ഉടൻ പുറത്തുവിടും''- പെന്റഗൺ കേന്ദ്രങ്ങൾ വാർത്താകുറിപ്പിലൂടെ അറിയിച്ചു.

യുഎസ് സൈനിക കേന്ദ്രങ്ങൾ ലക്ഷ്യമാക്കി 12-ലധികം ബാലസ്റ്റിക് മിസൈലുകള്‍ പ്രയോഗിച്ചതായാണ് റിപ്പോര്‍ട്ട്. ഇറാഖിലുള്ള അല്‍-ആസാദ്, ഇര്‍ബില്‍ എന്നീ സൈനിക താവളങ്ങള്‍ക്ക് നേരെയാണ് ആക്രമണമുണ്ടായിരിക്കുന്നത്. ഇറാൻ അമേരിക്കൻ സൈനിക കേന്ദ്രങ്ങൾ ലക്ഷ്യമിട്ടത് നേരിട്ടുള്ള യുദ്ധത്തിലേക്ക് കടക്കുമെന്ന സൂചനയാണ് നൽകുന്നത്. സംഭവം നിരീക്ഷിച്ച് വരികയാണെന്ന് പെന്‍റഗണും അറിയിച്ചിട്ടുണ്ട്.