ആൽബത്തിൽ സ്ത്രീകൾക്ക് അവസരം നൽകി; സംഗീതജ്ഞനെ അറസ്റ്റ് ചെയ്ത് ഇറാൻ

ടെഹ്റാൻ: ആൽബത്തിൽ സ്ത്രീകൾക്ക് അവസരം നൽകിയതിന് സംഗീതജ്ഞനെ അറസ്റ്റ് ചെയ്ത് ഇറാൻ ഭരണകൂടം. വനിതാ ഗായികയ്ക്കും നർത്തകിക്കുമൊപ്പം പ്രവർത്തിച്ചതിനാണ് സംഗീതജ്ഞനായ മെഹ്ദി രാജബിയനെ അറസ്റ്റ് ചെയ്തത്. തന്റെ സംഗീതവുമായി ബന്ധപ്പെട്ട് മുമ്പ് രണ്ട് തവണ മെഹ്ദി രാജബിയനെ ജയിലിൽ അടച്ചിട്ടുണ്ട് ഇറാൻ ഭരണകൂടം. രണ്ടാഴ്ച മുമ്പാണ് അസാനമായി അദ്ദേഹത്തെ അറസ്റ്റ് ചെയ്തതെന്ന് ബിബിസി റിപ്പോർട്ട് ചെയ്തു. ഇറാനിൽ നിരോധിക്കപ്പെട്ട ഗായകർക്ക് ആൽബത്തിൽ പാടാൻ അവസരം നൽകിയതിനാണ് അറസ്റ്റ്.

Also Read: ജേക്കബ് ബ്ലേക്ക്: 'അമേരിക്കൻ പോലീസിന്റെ ഒടുങ്ങാത്ത വംശീയത'; വെടിവെപ്പിൽ രണ്ട് മരണം; പ്രതിഷേധത്തിന്റെ മൂന്നാം ദിനം

"താൻ സംഗീതം ചെയ്യുന്നത് അവസാനിപ്പിക്കണമെന്നാണ് ഭരണകൂടം ആവശ്യപ്പെടുന്നത്." മെഹ്ദി രാജബിയൻ പറഞ്ഞു. ആഗസ്റ്റ് 10 നാണ് തന്നെ അറസ്റ്റ് ചെയ്ത് കോടതിയിൽ ഹാജരാക്കിയതെന്ന് അദ്ദേഹം പറഞ്ഞു. "പുതിയ പ്രൊജക്ട് വേശ്യാവൃത്തിയെ പ്രോത്സാഹിപ്പിക്കുന്നുവെന്നാണ് ജഡ്ജി പറഞ്ഞത്." ആൽബത്തിന്റെ പ്രവർത്തനവുമായി മുന്നോട്ടുപോയാൽ തന്റെ ജാമ്യം റദ്ദാക്കുമെന്നാണ് വ്യവസ്ഥ. സംഗീത പ്രവർത്തനവുമായി മുന്നോട്ട് പോകണമെങ്കിൽ കോടതി വിധി വരെ കാത്തിരിക്കേണ്ട അവസ്ഥയാണെന്നും അദ്ദേഹം പറയുന്നു.

ഉടൻ റിലീസ് ചെയ്യാനിരിക്കുന്ന ആൽബവുമായി ബന്ധപ്പെട്ട അഭിമുഖം അന്താരാഷ്ട്ര മാധ്യമമായ ബിബിസിക്ക് നൽകിയതോടെയാണ് മെഹ്ദി രാജബിയനെ ഇറാൻ ഭരണകൂടം അറസ്റ്റ് ചെയ്തത്.

Also Read: പോലീസ് സദാചാരം കളിക്കണ്ട, മേൽവസ്ത്രം ഇല്ലാതെ സൺബാത്ത് ചെയ്യാൻ സ്ത്രീകൾക്ക് അവകാശമുണ്ട്; ഫ്രാൻസിൽ ഒറ്റസ്വരം!

ഇറാൻ നിയമപ്രകാരം, നർത്തകർ, സംഗീതജ്ഞർ എന്നിവരുടെ പ്രവർത്തനങ്ങൾ മാന്യതയ്ക്ക് നിരക്കാത്തതാണെങ്കിൽ വിചാരണ ചെയ്യാമെന്നാണ് ഇറാനിലെ നിയമം. മുൻകൂട്ടി അനുവാദം വാങ്ങിയാൽ ഗായികമാർക്ക് സ്ത്രീകൾ മാത്രമുള്ള പരിപാടികളിൽ പാടാം. എന്നാൽ അനുവാദം ലഭിക്കുന്നത് അപൂർവ്വമാണെന്നാണ് റിപ്പോർട്ട്.