വീണ്ടും ലോക്ക് ഡൗൺ പ്രഖ്യാപിച്ച് യൂറോപ്പിലെ ഈ രാജ്യം; കൊവിഡ് ഭീഷണിയിൽ രാജ്യങ്ങൾ

ഡബ്ലിൻ: കൊവിഡ്-19 കേസുകളുടെ എണ്ണത്തിൽ വർധനയുണ്ടായതോടെ രണ്ടാമതും ലോക്ക് ഡൗൺ പ്രഖ്യാപിച്ച് അയർലൻഡ്. രോഗബാധിതരുടെ എണ്ണം വർധിച്ചതോടെ പ്രധാനമന്ത്രി മൈക്കിൾ മാർട്ടിനാണ് നിർണായക പ്രഖ്യാപനം നടത്തിയത്. ബുധനാഴ്‌ച അർധരാത്രിയോടെ നിയന്ത്രണങ്ങൾ നിലവിൽ വരും. ഇതോടെ രണ്ടാമതും ലോക്ക് ഡൗൺ പ്രഖ്യാപിക്കുന്ന ആദ്യ യൂറോപ്പ്യൻ രാജ്യമായി അയർലൻഡ്.

Also Read: വിസയില്ലാതെ പറക്കാം; ചരിത്രമെഴുതി ഇസ്രയേലും യുഎഇയും, പ്രഖ്യാപനവുമായി നെതന്യാഹു

ലോക്ക് ഡൗണിന് സമാനമായ നിയന്ത്രണങ്ങൾ രാജ്യത്തുണ്ടാകുമെന്ന സൂചനകൾ ദിവസങ്ങളായി രാജ്യത്തുണ്ടായിരുന്നു. ഇതിനിടെയാണ് രാജ്യം വീണ്ടും അടച്ചിടുകയാണെന്ന് പ്രധാനമന്ത്രി അറിയിച്ചത്. നിയന്ത്രണങ്ങൾ കർശനമാണെന്ന് തോന്നാമെങ്കിലും ക്രിസ്മസ് ആഘോഷിക്കണമെങ്കിൽ ഇത്തരം നടപടികൾ ആവശ്യമാണെന്ന് അദ്ദേഹം പറഞ്ഞു.

രാജ്യത്തെ ജനങ്ങൾ വീട്ടിൽ തന്നെ കഴിയണമെന്നാണ് സർക്കാരിൻ്റെ നിർദേശമെന്ന് ടെലിവിഷനിലൂടെ നടത്തിയ ലോക്ക് ഡൗൺ പ്രഖ്യാപനത്തിൽ മൈക്കിൾ മാർട്ടിൻ വ്യക്തമാക്കി. ശക്തമായ നിയന്ത്രണങ്ങൾ പ്രഖ്യാപിച്ചെങ്കിലും ഇളവുകളും കൊവിഡ് മാർഗനിർദേശങ്ങളും സർക്കാർ പുറപ്പെടുവിച്ചു.

Also Read: മൂക്കിലൂടെയുള്ള കൊവിഡ് വാക്‌സിൻ്റെ പ്രത്യേകതയെന്ത്? ഗുണങ്ങളും ദോഷങ്ങളും ഇങ്ങനെ

സ്‌കൂളുകളെ നിയന്ത്രണങ്ങളിൽ നിന്ന് ഒഴിവാക്കിയപ്പോൾ ചെറിയ വിൽപ്പന സ്ഥാപനങ്ങൾ അടച്ചിടും. ബാറുകൾക്കും റെസ്‌റ്റോറൻ്റുകൾക്കും നിയന്ത്രണത്തോടെ പ്രവർത്തിക്കാം. പാഴ്‌സൽ സൗകര്യങ്ങൾ മാത്രമാകും അനുവദിക്കുക. കുട്ടികൾക്കായുള്ള പരിപാലന കേന്ദ്രങ്ങൾക്കും തുറന്ന് പ്രവർത്തിക്കാം. വീടിന് അഞ്ച് കിലോമീറ്റർ ചുറ്റളവിനുള്ളിൽ വ്യായാമത്തിനായി പോകാം. അഞ്ച് കിലോമീറ്റർ പരിധി മറികടക്കുന്നതായി ശ്രദ്ധിയിൽ പെട്ടാൽ ഇവരിൽ നിയമനടപടികൾ സ്വീകരിക്കുമെന്നും അധികൃതർ വ്യക്തമാക്കി.