ഇസ്രയേലിനെ ജൂതരാഷ്ട്രമായി പ്രഖ്യാപിച്ചുകൊണ്ടുള്ള വിവാദ ബില്‍ പാസായി

ജറുസലേം: ഇസ്രയേലിനെ ജൂതരാഷ്ട്രമായി പ്രഖ്യാപിച്ചുകൊണ്ടുള്ള വിവാദ ബില്‍ ഇസ്രയേല്‍ പാര്‍ലമെന്റ് പാസ്സാക്കി. 55നെതിരെ 62 വോട്ടുകള്‍ക്കാണ് ബില്‍ പാസായത്. ഇസ്രയേലിന്റെ ചരിത്രത്തിലെ നാഴികക്കല്ല് എന്നാണ് നിയമം പാസായതിനെക്കുറിച്ച് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു അഭിപ്രായപ്പെട്ടത്.

ഇസ്രയേല്‍ ജൂതരാഷ്ട്രമാണ്. എല്ലാ പൗരന്മാരുടെയും വ്യക്തിഗത അവകാശങ്ങള്‍ ഇവിടെ ബഹുമാനിക്കപ്പെടും. ഈ നിയമം പൗരന്മാര്‍ക്കുവേണ്ടിയുള്ളതാണെന്ന് താന്‍ ആവര്‍ത്തിക്കുന്നുവെന്നും നെതന്യാഹു പറഞ്ഞു.

ജൂതന്മാരുടെ ജനാധിപത്യാവകാശങ്ങള്‍ക്കും പൗരാവകാശങ്ങള്‍ക്കും മുന്‍ഗണന ഉറപ്പാക്കുന്ന നിയമം രാജ്യത്തെ ന്യൂനപക്ഷങ്ങള്‍ക്ക് വെല്ലുവിളിയാകുമെന്നാണ് വിലയിരുത്തപ്പെടുന്നത്. ജൂതന്മാരുടെ പൂര്‍വ്വികഭൂമിയായതിനാല്‍ ഇസ്രയേലില്‍ ജൂതന്മാര്‍ക്ക് സവിശേഷ അധികാരമുണ്ടെന്നാണ് നിയമം പറയുന്നത്.

ഔദ്യോഗികഭാഷാ പദവിയില്‍ നിന്ന് അറബി ഭാഷയെ മാറ്റി തല്‍സ്ഥാനം ഹീബ്രുവിന് നല്‍കിയിട്ടുമുണ്ട്. അറബി ഇനി പ്രത്യേക ഭാഷാ പദവിയിലാകും. ജെറുസലേമാണ് ഇസ്രയേലിന്റെ തലസ്ഥാനമെന്നും നിയമത്തിലുണ്ട്. നിയമം പാര്‍ലമെന്റില്‍ പരിഗണനയ്‌ക്കെടുത്തതില്‍ അറബ് വംശജരായ പാര്‍ലമെന്റ് അംഗങ്ങള്‍ ശക്തമായി പ്രതിഷേധിച്ചിരുന്നു.