ചരിത്രത്തില്‍ ഏറ്റവും ക്രൂരനായ മാഫിയ തലവൻ ടോട്ടോ റീന മരിച്ചു

എഴുപതുകളിൽ ഇറ്റലിയെ വിറപ്പിച്ച കുപ്രസിദ്ധ സിസിലിയന്‍ മാഫിയയുടെ മുന്‍ തലവന്‍ ടോട്ടോ റീന (87)അര്‍ബുദബാധയെത്തുടര്‍ന്ന് അന്തരിച്ചു. വടക്കന്‍ ഇറ്റലിയിലെ പാര്‍മയില്‍ ജയില്‍ ആശുപത്രിയിലായിരുന്നു ഇയാള്‍ മരണത്തിന് കീഴടങ്ങിയത്. സിസിലിയന്‍ മാഫിയ ഡോൺ ആയിരുന്ന ടോട്ടോ ചെയ്തു കൂട്ടിയ കൊലപാതകങ്ങൾക്ക് കണക്കില്ല.

സിസിലിയന്‍ മാഫിയയുടെ ചരിത്രത്തില്‍ ഏറ്റവും ക്രൂരനായ നേതാക്കളില്‍ ഒരാളായിരുന്നു ടോട്ടോ. നൂറ്റമ്പതിലേറേ കൊലപാതകങ്ങള്‍ നടത്തിയിട്ടുള്ളതിനാല്‍ 26 ജീവപര്യന്തം തടവുകളാണ് ടോട്ടോയ്ക്ക് കോടതി വിധിച്ചിട്ടുള്ളത്. അതിക്രൂരനായിരുന്ന റീനയെ പിശാചെന്നും തലവന്‍മാരുടെ തലവനെന്നും വിളിച്ചിരുന്നു. രണ്ട് ശസ്ത്രക്രിയകള്‍ക്ക് വിധേയനായ റീന ആരോഗ്യ സ്ഥിതി മോശമായതിനെ തുടര്‍ന്ന് കുറച്ചുനാളായി അബോധാവസ്ഥയിലായിരുന്നു.