ജറുസലേം വിൽപനയ്ക്കുള്ള സ്ഥലമല്ലെന്ന് പാലസ്തീൻ

റാമല്ല: പാലസ്തീനുള്ള വാര്‍ഷികധനസഹായം നിര്‍ത്തലാക്കുമെന്ന ഡോണൾഡ് ട്രംപിന്‍റെ ഭീഷണിയോട് ശക്തമായി പ്രതികരിച്ച് പാലസ്തീൻ. ജറുസലേം വിൽപനയ്ക്കുള്ള സ്ഥലമല്ലെന്ന് പാലസ്തീൻ പ്രസിഡന്‍റ് മഹമൂദ് അബ്ബാസിന്‍റെ ഓഫീസ് വ്യക്തമാക്കി.

പാലസ്തീന് പ്രതിവര്‍ഷം നല്‍കിവരുന്ന മൂന്നുകോടിയോളം ഡോളറിന്‍റെ സഹായം നിര്‍ത്തലാക്കുമെന്നാണ് ട്രംപിന്‍റെ ഭീഷണി. പാലസ്തീന്‍റെ അനശ്വര തലസ്ഥാനമാണ് ജറുസലേമെന്നും അത് പണത്തിനോ സ്വര്‍ണത്തിനോ വേണ്ടി വിൽക്കാനുള്ളതല്ലെന്നും മഹമൂദ് അബ്ബാസ് വ്യക്തമാക്കി. ഇസ്രയേലിന്‍റെ തലസ്ഥാനമായി ജറുസലേമിനെ അംഗീകരിച്ച ട്രംപിന്‍റെ നടപടിയെ സൂചിപ്പിച്ചുകൊണ്ടായിരുന്നു പ്രതികരണം.

കോടിക്കണക്കിന് ഡോളര്‍ പ്രതിവര്‍ഷം സഹായമായി നല്‍കുന്നുണ്ടെങ്കിലും പാലസ്തീനിൽ നിന്ന് അതിനുള്ള അഭിനന്ദനമോ ബഹുമാനമോ തിരിച്ച് ലഭിക്കുന്നില്ലെന്നായിരുന്നു ഡോണൾഡ് ട്രംപിന്‍റെ ട്വീറ്റ്.