കെഎഫ്‍സി ചിക്കന്‍ ഒഴിവാക്കി പച്ചക്കറി വിളമ്പുമോ?

ഫ്രൈഡ് ചിക്കന്‍ ബ്രാന്‍ഡ് ആയ കെഎഫ്‍സി വെജിറ്റേറിയന്‍ പരീക്ഷണത്തില്‍. ചിക്കന് പകരം പച്ചക്കറി കൊണ്ടുവരാനാണ് കെഎഫ്‍സിയുടെ ശ്രമം. ബ്രിട്ടണിലാണ് ഇതില്‍ ആദ്യ പരീക്ഷണങ്ങള്‍ നടക്കുകയെന്ന് അമേരിക്കന്‍ ടെലിവിഷന്‍ ചാനല്‍, സിഎന്‍എന്‍ റിപ്പോര്‍ട്ട് ചെയ്‍തു.

പൂര്‍ണമായും ചിക്കന്‍ ഒഴിവാക്കാനുള്ള നടപടിയല്ല ഇതെന്നാണ് കെഎഫ്‍സി വിശദീകരിക്കുന്നത്. പകരം തങ്ങളുടെ ഭക്ഷണത്തിലെ കലോറി കുറയ്ക്കുന്നതിനുള്ള മാര്‍ഗമായാണ് വെജിറ്റേറിയന്‍ ഭക്ഷണത്തിലേക്ക് കെഎഫ്‍സി മാറുന്നത്. 2025 ആകുമ്പോള്‍ ഒരോ ഫ്രൈഡ് വിഭവത്തിലും 20 ശതമാനം വരെ കലോറി അളവ് കുറയ്ക്കുകയാണ് ലക്ഷ്യം.

വെജിറ്റേറിയന്‍ രുചിക്കൂട്ട് എന്തായിരിക്കും എന്നത് കെഎഫ്‍സി വെളിപ്പെടുത്തിയിട്ടില്ല.

ബ്രിട്ടണില്‍ അടുത്ത വര്‍ഷം ആദ്യവും അമേരിക്കയില്‍ പിന്നീടും ഇത് എത്തുമെന്നാണ് അറിയുന്നത്. ഇന്ത്യയുള്‍പ്പെടെയുള്ള രാജ്യങ്ങളിലേക്ക് ഈ പരീക്ഷണം എത്തുമോ എന്നതും വ്യക്തമല്ല.