ട്രംപുമായുള്ള കൂടിക്കാഴ്ചയ്ക്ക് കിം സിങ്കപ്പൂരിൽ

സിങ്കപ്പൂര്‍: യു എസ് പ്രസിഡന്‍റ് ഡോണള്‍ഡ് ട്രംപുമായുള്ള ചരിത്രപ്രധാനമായ കൂടിക്കാഴ്ചയ്ക്കായി ഉത്തര കൊറിയൻ ഏകാധിപതി കിം ജോങ് ഉൻ സിംഗപ്പൂരിലെത്തി. എയര്‍ ചൈനയുടെ ബോയിങ് 747 വിമാനത്തിലാണ് കിം സിംഗപ്പൂര്‍ ചാങ്കി രാജ്യാന്തര വിമാനത്താവളത്തിലെത്തിയത്.

ജൂൺ 12നാണ് ഇരുനേതാക്കളും തമ്മിലുള്ള സുപ്രധാന കൂടിക്കാഴ്ച.

ലോകത്ത് ഏറ്റവുമധികം വധഭീഷണി നേരിടുന്ന രാഷ്ട്രനേതാക്കളിലൊരാളായ കിമ്മിന്‍റെ സുരക്ഷയ്ക്കായി വ്യോമപാതയിലെ മറ്റെല്ലാ സര്‍വീസുകളും നിര്‍ത്തിവച്ചിരുന്നു. കിമ്മിന്‍റെ പ്രത്യേക വിമാനവും അദ്ദേഹത്തെ അനുഗമിക്കുന്ന ഉദ്യോഗസ്ഥര്‍ക്കായി മറ്റൊരു വിമാനവും മാത്രമാണ് ഈ റൂട്ടിൽ പറന്നത്. ഭീഷണി ഒഴിവാക്കാൻ ചൈനയുടെ വ്യോമപാതയിലൂടെയായിരുന്നു കൂടുതലും സഞ്ചാരം.

ചാങ്കി വിമാനത്താവളത്തിൽ നിന്ന് താമസിക്കുന്ന ആഡംബര ഹോട്ടലിലേയ്ക്ക് 20 കാറുകളുടെ അകമ്പടിയോടെയാണ് കിം പുറപ്പെട്ടത്. കിമ്മിനു സഞ്ചരിക്കാനായി എത്തിച്ച രണ്ട് ബെൻസ് ലിമോസിനുകള്‍ക്ക് പുറമെ പോലീസ് വാഹനങ്ങളും മൊബൈൽ ഹോസ്പിറ്റലും ഉള്‍പ്പെടെയുള്ള വാഹനങ്ങളും വാഹനവ്യൂഹത്തിലുണ്ടായിരുന്നു.