'അന്തസ്സോടെ' കുടിയേറാന്‍ കീരീബാസിനോട് ലോകബാങ്ക്

കീരീബാസ്: പസഫിക് ശൈത്യകാലത്തിന്‍റെ അവസാനനാളുകളില്‍ കീരീബാസിലെ ബെതിയൊ ആശുപത്രിയുടെ ജനല്‍ പാളികള്‍ തകര്‍ത്ത് തിരമാലകള്‍ അലയടിക്കും. പ്രസവ വാര്‍ഡിലേക്കുള്ള വൈദ്യുതിബന്ധം വിച്ഛേദിച്ച്, നിലത്തു നിന്നും വെള്ളം കോരി കളയുന്ന തിരക്കിലായിരിക്കും ബീരോ ഹൊസിയ എന്ന പരിചാരകന്‍. ഒന്നു ശക്തിയായി കാറ്റടിച്ചാല്‍ തീരും ഈ ആശുപത്രിയിലെ ഓരോ അന്തേവാസിയുടെയും കഥ. ഏതു നിമിഷവും പസഫിക് മഹാസമുദ്രത്തില്‍ മുങ്ങിപ്പോയേക്കാവുന്ന കീരീബാസ് എന്ന ദ്വീപുരാഷ്ട്രത്തിന് ഉത്കണ്ഠയുടെയും അനിവാര്യമായ രാജ്യാന്തര കുടിയേറ്റത്തിന്‍റെയും കഥയേ പറയാനുള്ളൂ.



കാലാവസ്ഥാ വ്യതിയാനവും ധ്രുവപ്രദേശത്തെ മഞ്ഞുരുക്കവും പസഫിക് സമുദ്രത്തിലെ ജലനിരപ്പ് ഉയര്‍ത്തുന്നത്, താഴ്ന്നു കിടക്കുന്ന ദ്വീപുരാഷ്ട്രങ്ങളെ പ്രതിസന്ധിയിലാഴ്ത്തുകയാണ്. ഒരു പതിറ്റാണ്ടിനുള്ളില്‍ കീരീബാസ് വാസയോഗ്യമല്ലാതാകും എന്നാണ് കാലാവസ്ഥാ ശാസ്ത്രജ്ഞരുടെ പ്രവചനം. ലോകബാങ്കിന്‍റെ 2013ലെ സാമ്പത്തിക റിപ്പോര്‍ട്ട് പ്രകാരം, ഭൂമികുലുക്കവും പ്രളയവും അതികഠിനമായ കാലാവസ്ഥയും മൂലം ലോകത്ത് ഏറ്റവും പിന്നോക്കം നില്‍ക്കുന്ന രാജ്യങ്ങളാണ് പസഫിക് ദ്വീപുരാഷ്ട്രങ്ങള്‍. ഇവയില്‍ 110,000 പൗരന്മാര്‍ മാത്രമുള്ള കീരീബാസ് അകാല മൃത്യു വരിക്കാന്‍ ഒരുങ്ങിക്കഴിഞ്ഞു.

33 പവിഴദ്വീപുകള്‍ ഉള്‍പെടുന്ന കീരീബാസ് സമുദ്രനിരപ്പില്‍ നിന്ന് വെറും 1.8 മീറ്റര്‍ ഉയരത്തിലാണ് സ്ഥിതി ചെയ്യുന്നത്. 2050ഓടെ കീരീബാസിലെ 6,500 ഗ്രാമങ്ങളില്‍ പകുതിയും മുങ്ങിപ്പോകുമെന്നാണ് ലോകബാങ്കിന്‍റെ പഠന റിപ്പോര്‍ട്ട് പറയുന്നത്. മണ്ണൊലിപ്പും തുടര്‍ച്ചയായ മഴയും മൂലമുണ്ടാകുന്ന വിളനഷ്ടവും ഭൂഗര്‍ഭജലക്ഷാമവും പകര്‍ച്ചവ്യാധികളും ദ്വീപുനിവാസികളെ ദുരിതത്തിലാഴ്ത്തുകയാണ്.



ഈ അവസരത്തിലാണ് കീരീബാസ് സര്‍ക്കാര്‍ ലോകബാങ്കിന്‍റെ 'അന്തസ്സോടെ കുടിയേറൂ' എന്ന ആഹ്വാനം സ്വീകരിച്ചത്. സമുദ്രനിരപ്പില്‍ നിന്ന് താരതമ്യേന ഉയരത്തില്‍ സ്ഥിതി ചെയ്യുന്ന ഫിജി എന്ന അയല്‍രാജ്യത്ത് ആറായിരം ഏക്കര്‍ സ്ഥലം വാങ്ങി രാജ്യത്തോടെ കുടിയേറാനുള്ള പദ്ധതിയിട്ടിരിക്കുകയാണ് കീരീബാസ് സര്‍ക്കാര്‍.

ഒരു രാജ്യം ഒന്നടങ്കം മറ്റൊരു രാജ്യത്തേക്ക് കുടിയേറുക എന്നത് തികച്ചും നിര്‍ഭാഗ്യകരമാണെന്ന് മുന്‍ കീരീബാസ് പ്രസിഡന്‍റ് അനോട്ടെ ടോങ് പറഞ്ഞു. കാലാവസ്ഥാ വ്യതിയാനം സത്യമാണ്. ഏറെ വൈകുന്നതിനു മുമ്പെ പ്രവര്‍ത്തിച്ചു തുടങ്ങേണ്ടിയിരിക്കുന്നു എന്ന് ഇതോടെയെങ്കിലും ലോകം മനസ്സിലാക്കണം എന്നും അദ്ദേഹം കൂട്ടിച്ചേര്‍ത്തു.