കുല്‍ഭൂഷണ്‍ ജാദവ് കസബിനെക്കാള്‍ വലിയ തീവ്രവാദി: മുഷറഫ്

ന്യൂഡല്‍ഹി: മുംബൈ ഭീകരാക്രമണക്കേസിലെ പ്രതിയായ അജ്‍മല്‍ കസബിനെക്കാള്‍ വലിയ തീവ്രവാദിയാണ് കുല്‍ഭൂഷണ്‍ ജാദവ് എന്ന് മുന്‍ പാകിസ്ഥാന്‍ പട്ടാള മേധാവി പര്‍വേസ് മുഷറഫ്. അജ്‍മല്‍ കസബ് മറ്റാരുടെയോ പ്രേരണയാല്‍ പ്രവര്‍ത്തിച്ച വ്യക്തിയാണെന്നും എന്നാല്‍ കുല്‍ഭൂഷണ്‍ ജാദവ് കൊടും ഭീകരനാണെന്നും മുഷറഫ് പാകിസ്ഥാനിലെ എആര്‍വൈ ന്യൂസിനോട് പറഞ്ഞു.

ജാദവ് തീവ്രവാദത്തിന് വളംവെക്കുകയായിരുന്നെന്നും അട്ടിമറികളിലൂടെ നിരവധി പേരെ കൊല്ലാന്‍ കൂട്ടുനിന്നിട്ടുണ്ടാകാമെന്നും മുഷറഫ് പറഞ്ഞു.

മുന്‍ ഇന്ത്യന്‍ നാവികസേനാ ഉദ്യോഗസ്ഥനായ കുല്‍ഭൂഷണ്‍ ജാദവിന് പാകിസ്ഥാനിലെ ഒരു പട്ടാള കോടതി വിധിച്ച വധശിക്ഷ രണ്ടു ദിവസം മുന്‍പ് അന്താരാഷ്ട്ര നീതിന്യായ കോടതി സ്റ്റേ ചെയ്‍തിരുന്നു. ഇത് അന്താരാഷ്ട്ര തലത്തില്‍ പാകിസ്ഥാന് വന്‍ തിരിച്ചടിയായിരുന്നു. ഈ വിധിയുടെ പശ്ചാത്തലത്തിലാണ് മുഷറഫിന്‍റെ പ്രസ്‍താവന.

ദേശീയ സുരക്ഷയെ ബാധിക്കുന്ന വിഷയമായതിനാല്‍ പാകിസ്ഥാന്‍ കേസ് നടത്താനായി അന്താരാഷ്ട്ര നീതിന്യായ കോടതിയില്‍ ഹാജരാകരുതായിരുന്നെന്നും മുഷറഫ് പറഞ്ഞു. തങ്ങളുടെ സുരക്ഷയെ ബാധിക്കുന്ന വിഷയത്തില്‍ തങ്ങളോട് ആജ്ഞാപിക്കാന്‍ ആര്‍ക്കും അവകാശമില്ലെന്നും മുഷറഫ് പറഞ്ഞു.

Pervez Musharraf says Kulbhushan Jadhav is 'a bigger terrorist than Ajmal Kasab'

Former Pakistan military dictator Pervez Musharraf, who's accused of high treason in his country, believes that Indian national Kulbhushan Jadhav "is a bigger terrorist than Ajmal Kasab".