കുവൈറ്റ് സിറ്റി: കൊവിഡ് വ്യാപനത്തിനെതിരായ പ്രതിരോധത്തിന്റെ ഭാഗമായി കുവൈറ്റില്‍ നടപ്പിലാക്കിയ രാത്രികാല കര്‍ഫ്യൂ റമദാനു ശേഷം പിന്‍വലിച്ചേക്കുമെന്ന് സൂചന. തിങ്കളാഴ്ച നടക്കുന്ന മന്ത്രിസഭാ യോഗം ഇക്കാര്യം ചര്‍ച്ച ചെയ്യുമെന്ന് അല്‍ ഖബസ് പത്രം റിപ്പോര്‍ട്ട് ചെയ്തു. ഇതുമായി ബന്ധപ്പെട്ട് ആരോഗ്യ മന്ത്രാലയം ഇന്ന് സമര്‍പ്പിക്കുന്ന റിപ്പോര്‍ട്ടിന്റെ അടിസ്ഥാനത്തിലായിരിക്കും നടപടി. രാജ്യത്ത് കൊവിഡ് വ്യാപനത്തിന്റെ തോത് കുറഞ്ഞുവരുന്ന പശ്ചാത്തലത്തില്‍ നിലവിലെ നിയന്ത്രണങ്ങളില്‍ കൂടുതല്‍ ഇളവുകള്‍ ഉണ്ടാകുമെന്ന പ്രതീക്ഷയിലാണ് നാട്ടുകാര്‍.
നിയന്ത്രണങ്ങളില്‍ ഇളവുകള്‍ നല്‍കുന്നതിന്റെ ഭാഗമായി രാജ്യത്തിലെ കഫേകള്‍, റസ്റ്റൊറന്റുകള്‍, വ്യാപാര സ്ഥാപനങ്ങള്‍ തുടങ്ങിയവ പൂര്‍ണമായോ ഭാഗികമായോ തുറക്കാനും അനുമതി നല്‍കിയേക്കും. പെരുന്നാള്‍ നമസ്‌കാരം പള്ളികള്‍ക്ക് പുറത്ത് ഈദ് ഗാഹുകളില്‍ വച്ച് നടത്തുന്ന കാര്യത്തിലും മന്ത്രിസഭാ യോഗം തീരുമാനമെടുക്കും. അറവു ശാലകളിലെ തിരിക്ക് നിയന്ത്രിക്കുന്നതിന് സംവിധാനം ഏര്‍പ്പെടുത്തുമെന്നും പത്രം റിപ്പോര്‍ട്ട് ചെയ്തു.
കൊവിഡ് വ്യാപനം തടയുന്നതിനായി മാര്‍ച്ച് ഏഴിനാണ് കുവൈറ്റില്‍ ഭാഗിക കര്‍ഫ്യൂ ഏര്‍പ്പെടുത്തിയത്. വൈകുന്നേരം ഏഴു മണി മുതല്‍ രാവിലെ അഞ്ചു മണി വരെയാണ് കര്‍ഫ്യൂ. കര്‍ഫ്യൂ വേളയില്‍ റസ്‌റ്റൊറന്റുകളില്‍ ഹോം ഡെലിവറി സംവിധാനം ഒഴികെ മറ്റെല്ലാ വ്യാപാര സ്ഥാപനങ്ങളും അടഞ്ഞുകിടക്കും.