ഇന്തോനേഷ്യയിൽ വിമാനാപകടം: വിമാനത്തിൽ 189 യാത്രക്കാര്‍

ജക്കാര്‍ത്ത: ഇൻഡോനേഷ്യയിൽ ലയൺ എയര്‍ കമ്പനിയുടെ യാത്രാവിമാനം തകര്‍ന്നു വീണു. ജക്കാര്‍ത്തയിൽ നിന്ന് ബങ്കാ ദ്വീപിലെ പങ്കാൽ പിനാങ്കിലേയ്ക്ക് പോയ ലയൺ എയര്‍ ജെ ടി 610 വിമാനം കടലിൽ തകര്‍ന്നു വീഴുകയായിരുന്നു. പറന്നുയര്‍ന്ന് 13 മിനിട്ടിനകമായിരുന്നു അപകടം. 8 ജീവനക്കാര്‍ ഉള്‍പ്പെടെ 189 യാത്രക്കാരാണ് വിമാനത്തിൽ ഉണ്ടായിരുന്നത്.

പ്രാദേശിക സമയം തിങ്കളാഴ്ച രാവിലെ ആറരയോടെയായിരുന്നു അപകടം. രാവിലെ 6.33നാണ് വിമാനവുമായി എയർ ട്രാഫിക് കൺട്രോള്‍ റൂമിൽ നിന്ന് അവസാന ആശയവിനിമയം നടന്നത്. അധികൃതര്‍ വിമാനം തകര്‍ന്നു വീണതായി സ്ഥിരീകരിച്ചു. ബോയിങ് 7373 മാക്സ് 8 വിമാനമാണ് തകര്‍ന്നു വീണത്.


പടിഞ്ഞാറൻ ജാവ പ്രവിശ്യയിലെ കരവാങിന് സമീപത്തു വെച്ചാണ് വിമാനവുമായുള്ള ബന്ധം നഷ്ടമായത്. ഈ പ്രദേശത്ത് വിമാനത്തിന്‍റെ അവശിഷ്ടങ്ങള്‍ കണ്ടെത്തിയിട്ടുണ്ട്. പ്രദേശത്ത് വിമാനത്തിനായി തിരച്ചിൽ തുടങ്ങിയിട്ടുണ്ട്. ഇവിടെയുണ്ടായിരുന്ന ഒരു ബോട്ടിലെ ജീവനക്കാർ വിമാനം തകർന്നു വീഴുന്നത് കണ്ടതായി അറിയിച്ചിട്ടുണ്ട്.