സിഡ്നി: ഓസ്ട്രേലിയില് പടര്ന്നുപിടിച്ച കാട്ടുതീയില് നാലുപേര്ക്കാണ് ജീവന് നഷ്ടപ്പെട്ടത്. മുന്നൂറിലേറെ വീടുകളാണ് കത്തിത്തീര്ന്നത്. ഒരാഴ്ച കൊണ്ട് 25 ലക്ഷം ഏക്കര് സ്ഥലത്താണ് തീ പടര്ന്നുപിടിച്ചത്.
കഞ്ചാവ് തോട്ടം സംരക്ഷിക്കാനായി തീയിട്ടെന്ന് പറഞ്ഞ് 51 വയസ്സുകാരന് കോടതിയില് കീഴടങ്ങിയിരിക്കുകയാണ് ഇപ്പോള്. ന്യൂ സൗത്ത് വെയ്ല്സിലെ എബോറിലുള്ള തന്റെ കഞ്ചാവ് തോട്ടം സംരക്ഷിക്കുന്നതിനായി തീയിട്ടതാണെന്നാണ് ഇയാള് പറയുന്നത്.
വ്യാഴാഴ്ചയാണ് ഇയാള് കഞ്ചാവ് തോട്ടത്തിനടുത്ത് തീയിട്ടത്. എന്നാല് തീ പടര്ന്നു പിടിക്കുകയായിരുന്നു. ഇയാള് തീയണയ്ക്കാന് ശ്രമം നടത്തിയില്ലെന്ന് പോലീസ് പറയുന്നു. പതിനായിരം ഹെക്ടറിലധികം സ്ഥലത്താണ് എബോറില് തീ പടര്ന്നത്. മൂന്നു ദിവസം പിന്നിട്ടപ്പോഴും തീയണയ്ക്കാനായിട്ടില്ല.
Also Read അമേരിക്കന് ഉപരോധത്തില് ഞെരുങ്ങി ഇറാന്: റൂഹാനി സര്ക്കാരിനെതിരെ പ്രക്ഷോഭം ശക്തം; ഒരാള് കൊല്ലപ്പെട്ടു
ഓസ്ട്രേലിയയുടെ പല ഭാഗങ്ങളിലും ഏതാനും ദിവസങ്ങളായി കുറ്റിക്കാടുകളിലും പുല്ലുകളിലും തീ പടര്ന്നുപിടിക്കുകയാണ്. ന്യൂ സൗത്ത് വെയ്ല്സ്, ക്യൂന്സ്ലന്ഡ് തുടങ്ങിയ സ്ഥലങ്ങളിലെല്ലാം വിശാലമായ പ്രദേശങ്ങളാണ് തീ വിഴുങ്ങിയത്. തീപ്പിടിത്തത്തിന്റെ കാരണങ്ങള് കണ്ടെത്താന് പോലീസ് ഊര്ജിത ശ്രമം തുടങ്ങിയിട്ടുണ്ട്. തീയിടുന്നത് ശ്രദ്ധയില്പെട്ടാല് അറിയിക്കാന് പൊതുജനങ്ങള്ക്ക് നിര്ദേശം നല്കിയിട്ടുണ്ട്.
ഞായറാഴ്ച മാത്രം ന്യൂ സൗത്ത് വെയില്സിലും ക്യൂന്സ്ലന്ഡിലുമായി 130 ഇടത്താണ് തീപ്പിടിത്തമുണ്ടായത്. കടുത്ത വര്ള്ച്ചയിലാണ് ഈ പ്രദേശങ്ങള്.
Also Read ശ്രീലങ്കയില് ഗോതബായ രാജപക്സെ പ്രസിഡന്റ്; ജനങ്ങളുടെ വിധി അംഗീകരിക്കുന്നുവെന്ന് സജിത് പ്രേമദാസ
ശനിയാഴ്ച ചൂട് അല്പം കുറഞ്ഞതിനാല് അഗ്നിരക്ഷാ സേനാംഗങ്ങള് തീകെടുത്താന് കൂടുതല് ശ്രമങ്ങള് നടത്തി. അടുത്തയാഴ്ച തുടങ്ങുന്നതോടെ തീ പടരുന്നത് തടയാനാകുമെന്നാണ് പ്രതീക്ഷിക്കുന്നത്.
ക്യൂന്സ്ലന്ഡില് താപനില വളരെ ഉയര്ന്നതായതിനാല് തീപ്പിടിത്ത സാധ്യത വളരെ കൂടുതലാണ്. അടുത്തയാഴ്ച ചൂട് കൂടാനും ശക്തമായ കാറ്റടിക്കാനും സാധ്യതയുണ്ടെന്ന് മുന്നറിയിപ്പുണ്ട്. അങ്ങനെയായാല് അഗ്നിരക്ഷാസേനയ്ക്ക് കൂടുതല് ബുദ്ധിമുട്ടാകും.
കാലാവസ്ഥാ വ്യതിയാനത്തിന്റെ ഫലമായാണ് ഇത്തവണ ഓസ്ട്രേയിയില് ഉഷ്ണകാലത്തിനും കാട്ടുതീക്കും നേരത്തെ തുടക്കമായത്. കടുത്ത ചൂടില് അന്തരീക്ഷത്തിലെ ഈര്പ്പം ഇല്ലാതായിരിക്കുകയാണ്.
Also Read എരിതീയില് എണ്ണയൊഴിച്ച് ചൈന; ചൂലും ബക്കറ്റുമായി ചൈനീസ് പട്ടാളം ഹോങ്കോങ് തെരുവില്
ജൈവ ഇന്ധനങ്ങള് ഉപയോഗിക്കാനുള്ള തടസ്സങ്ങള് നീക്കണമെന്നും ഹരിതഗൃഹ വാതക വികിരണം കുറയ്ക്കണമെന്നുമുള്ള നിര്ദേശം ഓസ്ട്രേലിയയിലെ കണ്സര്വേറ്റീവ് സര്ക്കാര് അവഗണിക്കുകയാണ്. ഇതാണ് പരിസ്ഥിതിക്ക് ഭീഷണിയാകുന്ന കാട്ടുതീക്ക് കാരണമെന്ന് പ്രകൃതി സ്നേഹികള് പറയുന്നു. ലാഭകരമായ ഖനന വ്യവസായം സംരക്ഷിക്കാന് താത്പര്യപ്പെടുന്ന സര്ക്കാര് പ്രകൃതിയെ മറക്കുകയാണെന്നും ഇവര് കുറ്റപ്പെടുത്തുന്നു.