ഇസ്രായേലുമായുള്ള 500 മില്ല്യണ്‍ ഡോളറിന്റെ ആയുധ കരാര്‍ ഇന്ത്യ റദ്ദാക്കുന്നു

ന്യൂഡല്‍ഹി: ഇസ്രായേലുമായുള്ള 500 മില്ല്യണ്‍ ഡോളറിന്റെ മിസൈൽ ഇടപാട് റദ്ദാക്കാനൊരുങ്ങി ഇന്ത്യ. പകരം കേന്ദ്ര പ്രതിരോധ ഗവേഷണ വികസന സംഘത്തിന്റെ(ഡിആര്‍ഡിഒ) നേതൃത്വത്തില്‍ മിസൈലുകള്‍ വികസിപ്പിക്കാനാണ് ലക്ഷ്യമിടുന്നത്.

പ്രതിരോധ രംഗത്ത് ഇന്ത്യ- ഇസ്രായേല്‍ സഹകരണത്തിന്റെ ശക്തമായ സൂചനയായാണ് ഈ ആയുധ കരാറിനെ വിലയിരുത്തിയിരുന്നത്. മിസൈല്‍ വാങ്ങുന്നത് സംബന്ധിച്ച സാമ്പത്തിക ഇടപാടുകളെ കുറിച്ചുള്ള ചര്‍ച്ചകള്‍ കഴിഞ്ഞ വര്‍ഷം തന്നെ ഇരു രാജ്യങ്ങളും ചേര്‍ന്ന് പൂര്‍ത്തിയാക്കിയിരുന്നു. ഇസ്രായേലിന്റെ റാഫേല്‍ അഡ്വാന്‍സ്ഡ് ഡിഫന്‍സ് സിസ്റ്റവുമായിട്ടായിരുന്നു ഇന്ത്യയ്ക്ക് കരാറുണ്ടായിരുന്നത്.

കരാറിനോടനുബന്ധിച്ച് രാജ്യത്തെ മിസൈല്‍ നിര്‍മ്മാതാക്കളായ കല്ല്യാണി ഗ്രൂപ്പുമായി കൈകോര്‍ത്ത് പ്രാരംഘട്ട പ്രവര്‍ത്തനങ്ങളും ഇസ്രായേല്‍ ആരംഭിച്ചിരുന്നു. എന്നാല്‍ ഇപ്പോഴത്തെ സാഹചര്യത്തില്‍ കരാറില്‍ നിന്നും പിന്മാറുന്നതായി പ്രതിരോധ മന്ത്രാലയ വക്താക്കള്‍ വിശദീകരിച്ചു.