ഫാഷൻ ഷോക്കിടെ മോഡൽ കുഴഞ്ഞു വീണു മരിച്ചു

സാവോ പോളോ: പുരുഷ മോഡൽ ഫാഷൻ ഷോക്കിടെ കുഴഞ്ഞു വീണു മരിച്ചു. ബ്രസീലിലെ സാവോ പോളോ ഫാഷൻ വീക്കിന്റെ റാമ്പ് വോക്കിനിടെയാണ് ടെയിൽസ് സോർസ് എന്ന മോഡൽ കുഴഞ്ഞു വീണത്. റാമ്പ് വോക്കിനിടെ കുഴഞ്ഞു വീണ ടെയിൽസ് സോർസിനെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ലെന്ന് സാവോ പോളോ ഫാഷൻ വീക്ക് സംഘാടകർ അറിയിച്ചു. കുഴഞ്ഞു വീണപ്പോൾ തന്നെ ടെയിൽസ് സോർസിനെ ഡോക്ടർമാരുടെ സംഘം പരിശോധിച്ചിരുന്നുവെന്ന് പ്രാദേശിക മാധ്യമങ്ങളെ ഉദ്ധരിച്ച് എഎഫ്പി റിപ്പോർട്ട് ചെയ്തു. സോർസിന്റെ മരണ കാരണം എന്താണെന്ന് ഇത് വരെ വ്യക്തമാക്കിയിട്ടില്ല.