ന്യൂഡൽഹി: ലോകരാജ്യങ്ങളെ ഭീതിയിലാഴ്ത്തിയ കൊവിഡ്-19 ഒടുവിൽ മ്യൻമാറിലും റിപ്പോർട്ട് ചെയ്തു. ലോകമെമ്പാടുമായി 3,84313 ആളുകളിൽ രോഗം സ്ഥിരീകരിച്ചപ്പോഴാണ് മ്യാൻമറിലെ ആദ്യത്തെ കൊറോണ പോസിറ്റീവ് കേസ് റിപ്പോർട്ട് ചെയ്യുന്നത്. ഇന്ത്യയുൾപ്പെടെയുള്ള രാജ്യങ്ങൾ കടുത്ത നിയന്ത്രണങ്ങളിലൂടെ കടന്ന് പോകവെ തിങ്കളാഴ്ച രണ്ട് പോസിറ്റീവ് കേസുകളാണ് മ്യാൻമറിൽ നിന്നും റിപ്പോർട്ട് ചെയ്യപ്പെട്ടത്.
54 മില്യൺ ജനങ്ങളുള്ള മ്യാൻമറിൽ ഇതുവരെ കൊവിഡ്-19 റിപ്പോർട്ട് ചെയ്തിരുന്നില്ലെങ്കിലും രാജ്യം ജാഗ്രത പുലർത്തിയിരുന്നെന്നാണ് റിപ്പോർട്ടുകൾ വ്യക്തമാക്കുന്നത്. യുഎസിൽ നിന്ന് മടങ്ങിയെത്തിയ 36 കാരനും ബ്രിട്ടനിൽ നിന്ന് മടങ്ങിയെത്തിയ 26 കാരനുമാണ് കൊവിഡ്-19 സ്ഥിരീകരിച്ചതെന്ന് മ്യൻമാർ ആരോഗ്യ മന്ത്രാലയം വ്യക്തമാക്കി.
Also Read:LIVE: മഹാരാഷ്ട്രയിൽ കൊവിഡ്-19 ബാധിച്ചവരുടെ എണ്ണം 107
ഇരുവരുമായി ബന്ധം പുലർത്തിയിരുന്നവരെ കണ്ടെത്താൻ ആരംഭിച്ചിട്ടുണ്ടെന്ന് ആരോഗ്യ മന്ത്രാലയം പ്രസ്താവനയിൽ അറിയിച്ചു. അതേസമയം ഇന്ത്യയിൽ രോഗം സ്ഥിരീകരിച്ചവരുടെ എണ്ണം അഞൂറിനടത്ത് എത്തിയിരിക്കുകയാണെന്നത് ശ്രദ്ധേയമാണ്.
രാജ്യത്ത് കൂടുതൽ കൊവിഡ്-19 കേസുകൾ റിപ്പോർട്ട് ചെയ്ത മഹാരാഷ്ട്രയിൽ പുതുതായി 6 പേരിൽ കൂടി വൈറസ് ബാധ സ്ഥിരീകരിച്ചു. ഇതോടെ സംസ്ഥാനത്ത് മാത്രം രോഗം ബാധിച്ചവരുടെ എണ്ണം 107 ആയി ഉയർന്നിട്ടുണ്ട്.