ലോകത്തിലെ ഏറ്റവും പ്രായമുള്ള വ്യക്തി അന്തരിച്ചു

ടോക്യോ: ലോകത്തിലെ ഏറ്റവും പ്രായമുള്ള വ്യക്തിയെന്ന് വിശ്വസിക്കുന്നയാള്‍ അന്തരിച്ചു. 19-ാം നൂറ്റാണ്ടിന്‍റെ അവസാന വര്‍ഷത്തില്‍ ജനിച്ചെന്ന് അവകാശപ്പെടുന്ന ജപ്പാനില്‍ നിന്നുള്ള നബി തജിമ എന്ന അമ്മൂമ്മയാണ് ഇന്ന് മരണത്തിന് കീഴടങ്ങിയതെന്ന് റോയിറ്റേഴ്‍സ്‍ വാര്‍ത്താ ഏജന്‍സി റിപ്പോര്‍ട്ട് ചെയ്യുന്നു.

പ്രാദേശിക ജപ്പാനീസ് മാധ്യമങ്ങള്‍ ഇവരുടെ പ്രായം 117 ആണെന്ന് സ്ഥിരീകരിച്ചു.

ഗിന്നസ് ലോക റെക്കോഡ‍് സമിതി ഇവരെ സന്ദര്‍ശിച്ചിരുന്നു. പ്രായത്തിന്‍റെ കാര്യത്തില്‍ ഒന്നാം സ്ഥാനത്ത് നബിയെ പ്രഖ്യാപിക്കാന്‍ പഠനവും നടത്തിക്കൊണ്ടിരിക്കുകയായിരുന്നു. 117 വയസുകാരിയായ ജമൈക്കന്‍ അമ്മൂമ്മ, വയലറ്റ് ബ്രൗണ്‍ കഴിഞ്ഞ വര്‍ഷം മരിച്ചതോടെ സ്വാഭാവികമായും ഒന്നാം സ്ഥാനം നബിക്കാണ് അവകാശപ്പെട്ടതെന്ന് ജപ്പാനിലെ ക്യോഡോ വാര്‍ത്താ ഏജന്‍സി റിപ്പോര്‍ട്ട് ചെയ്‍തു.

ലോകത്തിലെ ഏറ്രവും പ്രായമുള്ള പുരുഷന്‍ ജപ്പാനില്‍ നിന്ന് തന്നെയുള്ള 112 വയസുകാരനായ മസാബോ നൊനാക ആണെന്ന് ഗിന്നസ് അധികൃതര്‍ അംഗീകരിച്ചിരുന്നു. നൂറ് വയസ് പിന്നിട്ടവരുടെ എണ്ണത്തില്‍ ജപ്പാന്‍ മറ്റുരാജ്യങ്ങളെക്കാള്‍ മുന്നിലാണ് 67, 824 പേര്‍ ജപ്പാനില്‍ നൂറ് പിന്നിട്ടവരാണ്.