സമാധാനചര്‍ച്ച: നടപടികള്‍ക്ക് വേഗം പകര്‍ന്ന് കിം

സോള്‍: കൊറിയൻ മേഖലയിലെ സമാധാനശ്രമങ്ങള്‍ക്ക് ശക്തിപകര്‍ന്ന് ഉത്തര കൊറിയൻ ഏകാധിപതി കിം ജോങ് ഉൻ. ഉന്നതതലചര്‍ച്ചയ്ക്ക് ദക്ഷിണകൊറിയ മുന്നോട്ടുവെച്ച ഉപാധികള്‍ അംഗീകരിച്ച ഉത്തരകൊറിയ ഏപ്രിൽ അവസാനം നടക്കുന്ന കൊറിയൻ ഉച്ചകോടിയുടെ അജണ്ട നിശ്ചയിക്കാൻ 29ന് ഇരുരാജ്യങ്ങളുടെയും ഉന്നതതലയോഗം നടക്കുമെന്ന് അറിയിച്ചു.

ഇരുരാജ്യങ്ങളുടെയും ഇടയിലുള്ള സൈനികരഹിതഗ്രാമമായ പൻമുൻജം ട്രൂസിലായിരിക്കും ചര്‍ച്ച. ദക്ഷിണ കൊറിയൻ പ്രസിഡന്‍റ് മൂൺ ജെ ഇന്നും കിമ്മുമായി കൂടിക്കാഴ്ച നടത്താനാണ് നിശ്ചയിച്ചിട്ടുള്ളത്. ദക്ഷിണകൊറിയയുടെ പ്രതിനിധിസംഘത്തെ മന്ത്രി ചോ മ്യോങ് ഗ്യോൻ നയിക്കും. അതേസമയം, ഉത്തരകൊറിയൻ സംഘത്തെ ആരാകും നയിക്കുക എന്ന് വ്യക്തമല്ല.

ഇതിനുമുൻപ് 2000, 2007 വർഷങ്ങളിലാണ് കൊറിയൻ ഉച്ചകോടി നടന്നിട്ടുള്ളത്.

ഇതിനിടെ ഉത്തരകൊറിയയിൽ നേതൃമാറ്റം സംബന്ധിച്ച അഭ്യൂഹങ്ങളും പുറത്തുവരുന്നുണ്ട്. ഔപചാരിക രാഷ്ട്രത്തലവൻ കിം യോങ് നാം സ്ഥാനം ഒഴിഞ്ഞ് പകരം നിലവിലെ വിദേശകാര്യമന്ത്രിയായ യോങ് ഹോ ചുമതലയേൽക്കുമെന്നാണ് സൂചന. ലോകരാജ്യങ്ങളുമായി നയതന്ത്രബന്ധം മെച്ചപ്പെടുത്താനുള്ള കിം ജോങ് ഉന്നിന്‍റെ ശ്രമങ്ങളുടെ ഭാഗമായാണ് ഇത് വിലയിരുത്തപ്പെടുന്നത്. ഏപ്രിൽ 11ന് രാജ്യത്ത് വാര്‍ഷിക പാര്‍ലമെന്‍റ് സമ്മേളനം ചേരുന്നുണ്ട്.

യുഎസ് പ്രസിഡന്‍റ് ഡോണൾഡ് ട്രംപുമായുള്ള കിം ജോങ് ഉന്നിന്‍റെ കൂടിക്കാഴ്ചയ്ക്ക് മുന്നോടിയായി ഉത്തരകൊറിയൻ പ്രതിനിധിയുടെ ഫിൻലൻഡ് സന്ദര്‍ശനം ഫലപ്രദമായിരുന്നുവെന്നാണ് ഫിന്നിങ് വിദേശകാര്യ മന്ത്രാലയം അറിയിച്ചത്. ട്രംപ് - ഉൻ കൂടിക്കാഴ്ചയുടെ വേദി ഫിൻലൻഡ് ആയിരിക്കുമെന്നാണ് സൂചന.