അമേരിക്കയുടെ ശ്രമം അധിനിവേശം; ചര്‍ച്ച റദ്ദാക്കുമെന്ന് കിം ജോങ്

വാഷിങ്‍ടണ്‍: അമേരിക്കന്‍ പ്രസിഡന്‍റ്‍ ഡോണള്‍ഡ് ട്രംപുമായി അടുത്ത മാസം നടക്കുന്ന കൂടിക്കാഴ്‍ച്ച റദ്ദാക്കുമെന്ന് മുന്നറിയിപ്പ് നല്‍കി ഉത്തരകൊറിയയുടെ നേതാവ് കിം ജോങ് ഉന്‍. ദക്ഷിണ കൊറിയയുമായി അമേരിക്കന്‍ വ്യോമസേന നടത്തുന്ന സംയുക്ത സൈനിക അഭ്യാസമാണ് കിമ്മിനെ പ്രകോപിപ്പിച്ചത്.

ഉത്തര കൊറിയക്ക് മേല്‍ അധിനിവേശം നടത്താനുള്ള പരിശീലനമാണ് അമേരിക്ക നടത്തുന്നതെന്ന് കിം മുന്‍പും ആരോപിച്ചിട്ടുണ്ട്. സ്ഥിരം നടക്കുന്ന പരിശീലനമാണിതെന്നാണ് അമേരിക്കയുടെ നിലപാട്.

'കൊറിയന്‍ ഉപദ്വീപില്‍ നടക്കുന്ന ശുഭകരമായ രാഷ്ട്രീയ മാറ്റങ്ങള്‍ക്ക് വിരുദ്ധമാണ് ഇപ്പോള്‍ നടക്കുന്ന ദക്ഷിണ കൊറിയ - അമേരിക്ക സൈനിക അഭ്യാസം. ഇത് ഞങ്ങളെ ഉദ്ദേശിച്ചാണ് നടക്കുന്നത്. മനപൂര്‍വമുള്ള പ്രകോപനമാണിത്' ഉത്തര കൊറിയയുടെ വാര്‍ത്താ ഏജന്‍സി, കെസിഎന്‍എ പ്രസ്‍താവനയില്‍ അറിയിച്ചു.

സിംഗപ്പൂരില്‍ വച്ചാണ് ട്രംപ്, കിം ജോങ് കൂടിക്കാഴ്‍ച്ച നടക്കുന്നത്. ദക്ഷിണ കൊറിയയുമായുള്ള അഭിപ്രായ ഭിന്നതകള്‍ ഉപേക്ഷിച്ച് സൗഹൃദം പുലര്‍ത്താന്‍ രണ്ട് കൊറിയകളുടെയും നേതാക്കള്‍ തീരുമാനിച്ചിരുന്നു. അതിര്‍ത്തിയില്‍വച്ച് ഇരുവരും തമ്മിലുള്ള കൂടിക്കാഴ്‍ച്ച പ്രതീക്ഷയോടെയാണ് ലോകം കണ്ടത്.

ആണവ ആയുധങ്ങള്‍ ഉപേക്ഷിക്കാനും ഉത്തര കൊറിയ സമ്മതം മൂളിയിരുന്നു. ഇതിനിടയിലാണ് ആകസ്‍മികമായി പുതിയ വിവാദം ഉടലെടുക്കുന്നത്.