ഓക്സ്ഫഡ് കൊവിഡ് വാക്സിൻ പരീക്ഷണം പുനഃരാരംഭിച്ചു

ന്യൂഡൽഹി: കൊവിഡ് വാക്സിൻ പ്രതീക്ഷകൾക്ക് പുതുജീവൻ നൽകി ഓക്സ്ഫഡ് കൊവിഡ് വാക്സിൻ പരീക്ഷണം പുനഃരാരംഭിച്ചു. യുകെയിലെ വാക്സിൻ പരീക്ഷണമാണ് പുനഃരാരംഭിച്ചിരിക്കുന്നത്. നേരത്തെ വാക്സിൻ കുത്തിവച്ചയാൾക്ക് 'അജ്ഞാത അസുഖം' കണ്ടെത്തിയതിനെത്തുടർന്ന് നിർത്തിവെച്ച പരീക്ഷണമാണ് പുനഃരാരംഭിച്ചതെന്ന് ടൈംസ് ഓഫ് ഇന്ത്യയാണ് റിപ്പോർട്ട് ചെയ്തത്. ലോകത്ത് കൊവിഡ് പരീക്ഷണങ്ങളിൽ ഏറ്റവും കൂടുതൽ പ്രതീക്ഷയർപ്പിച്ചിരിക്കുന്ന വാക്സിനാണ് ഓക്സ്ഫഡ്- അസ്ട്രാസെനെകയുടേത്.

'മെഡിസിൻസ് ഹെൽത്ത് റെഗുലേറ്ററി അതോറിറ്റി (എം‌എച്ച്‌ആർ‌എ)യുടെ സ്ഥിരീകരണം ലഭിച്ചതിനെത്തുടർന്ന് ആസ്ട്രാസെനെക ഓക്സ്ഫോർഡ് കൊറോണ വൈറസ് വാക്സിന്‍റെ ക്ലിനിക്കൽ പരീക്ഷണങ്ങൾ യുകെയിൽ പുനരാരംഭിച്ചു.'കമ്പനി പ്രസ്താവനയിലൂടെ പറഞ്ഞു. നേരത്തെ ഓക്സഫഡ് യൂണിവേഴ്സിറ്റി പരീക്ഷണം നിർത്തിവെച്ചതിനു പിന്നാലെ പുനെയിലെ സിറം ഇൻസ്റ്റിറ്റ്യൂട്ടും ഇന്ത്യയിലെ വാക്സിൻ മൂന്നാം ഘട്ട പരീക്ഷണം താല്ക്കാലികമായി നിർത്തി വച്ചിരുന്നു.

Also Read: ഓക്സ്ഫഡ് കൊവിഡ് വാക്സിൻ കുത്തിവച്ചയാൾക്ക് 'അജ്ഞാത അസുഖം'; പരീക്ഷണം നിർത്തിവെച്ചു

ജൂലായ് 20നാണ് ഓക്സ്ഫഡ് സര്‍വകലാശാല കൊവിഡ്-19 വാക്സിന്‍ വികസിപ്പിച്ചെടുത്തത്. ഇന്ത്യയിലെ സിറം ഇൻസ്റ്റിറ്റ്യൂട്ട് ഉൾപ്പെടെ വിവിധ രാജ്യങ്ങളിലെ സ്ഥാപനങ്ങളാണ് പരീക്ഷണത്തോട് സഹകരിച്ച് വരുന്നത്. കൊവിഡ് വാക്സിൻ പരീക്ഷണം അവസാനഘട്ടത്തിലാണിപ്പോൾ. ആദ്യ രണ്ട് ഘട്ട പരീക്ഷണങ്ങൾ വിജയകരമാണെന്ന് നേരത്തെ റിപ്പോർട്ടുകളുണ്ടായിരുന്നു.

ഈ വർഷം അവസാനത്തോടെയോ, അല്ലെങ്കിൽ അടുത്തവർഷം ആദ്യമോ ഓക്സ്ഫഡ് വാക്സിൻ വിപണിയിലെത്തുമെന്നായിരുന്നു നേരത്തെ പുറത്തുവന്ന റിപ്പോർട്ടുകൾ. ഇതിനിടയിലാണ് കുത്തിവെപ്പ് സ്വീകരിച്ചയൊരാൾക്ക് അജ്ഞാത അസുഖം കണ്ടെത്തിയതും പരീക്ഷണം താൽക്കാലികമായി നിർത്തിവെച്ചതും. വാക്സിൻ പരീക്ഷണം പുനഃരാരംഭിച്ചെന്ന വാർത്തകൾ പ്രതിദിന കൊവിഡ് കേസുകൾ ഉയരുമ്പോഴും പ്രതീക്ഷയേകുന്നതാണ്.