സുരക്ഷാവലയത്തിൽ ഇന്ന് പാകിസ്ഥാനില്‍ തെരഞ്ഞെടുപ്പ്

ഇസ്‌ലാമാബാദ്: പാകിസ്ഥാന്‍ ഇന്ന് പോളിംഗ് ബൂത്തിലേക്ക്. തെരഞ്ഞെടുപ്പിനുള്ള അവസാനവട്ട ഒരുക്കങ്ങള്‍ പൂര്‍ത്തിയായിരിക്കുകയാണ്. രാജ്യത്തെ 85,000 പോളിംഗ് ബൂത്തുകളുടെ സുരക്ഷ ഉറപ്പാക്കുന്നതിന് 3,71,388 സൈനികരെയാണ് നിയോഗിച്ചിട്ടുള്ളത്. അഴിമതിക്കേസില്‍ ശിക്ഷിക്കപ്പെട്ട് ജയിലില്‍ കഴിയുന്ന നവാസ് ശെരീഫിന്റെ പാകിസ്ഥാന്‍ മുസ്‍ലിംലീഗ് മുന്‍ ക്രിക്കറ്റ് താരം ഇമ്രാന്‍ ഖാന്‍റെ തെഹ്‍രീകെ ഇന്‍സാഫ് പാര്‍ട്ടി, ബിലാവല്‍ ഭൂട്ടോ നേതൃത്വം നല്‍കുന്ന പാകിസ്താന്‍ പീപ്പ്ള്‍സ് പാര്‍ട്ട് എന്നിവരാണ് മല്‍സര രംഗത്തുള്ള പ്രധാന പാര്‍ട്ടികള്‍.

നവാസ് ഷരീഫിന്‍റെയും ഇമ്രാന്‍ ഖാന്‍റെയും പാര്‍ട്ടികളാണ് മുഖ്യമായും മത്സരരംഗത്തുള്ളത്. ബിലാവല്‍ ഭൂട്ടോയുടെ കക്ഷിയുമുണ്ട്. ഏറ്റവും ഒടുവിലത്തെ അഭിപ്രായവോട്ടെടുപ്പ് ഇമ്രാന്‍റെ പാര്‍ട്ടിക്കാണ് മുൻതൂക്കം പ്രവചിച്ചിരിക്കുന്നത്. തെരഞ്ഞെടുപ്പ് നടക്കുന്നത് ദേശീയ അസംബ്ലിയിലേക്കും നാല് പ്രവിശ്യാ നിയമസഭയിലേക്കും; ജനവിധി തേടുന്നത് പതിനൊന്നായിരത്തിലധികം സ്ഥാനാര്‍ഥികള്‍; മൂന്നരലക്ഷത്തിലധികം സൈനികരെ വിന്യസിച്ചു. പാകിസ്ഥാന്റെ ചരിത്രത്തില്‍ ഇത് രണ്ടാം തവണയാണ് ജനാധിപത്യ സര്‍ക്കാര്‍ പട്ടാള അട്ടിമറിയില്ലാതെ കാലാവധി പൂര്‍ത്തിയാക്കി തെരഞ്ഞെടുപ്പിനൊരുങ്ങുന്നത്.