പാക് ആഭ്യന്തര മന്ത്രിക്ക് നേരെ അ‍ജ്ഞാതൻ വെടിയുതിര്‍ത്തു

ഇസ്ലാമാബാദ്: പാക് ആഭ്യന്തര മന്ത്രി അഹ്‌സാന്‍ ഇഖ്ബാലിന് നേരെ അ‍ജ്ഞാതൻ വെടിയുതിര്‍ത്തു. നറോവലിലെ റാലിയില്‍ പങ്കെടുക്കവേയാണ് മന്ത്രിക്ക് നേരെ അജ്ഞാതന്‍റെ വധ ശ്രമം. റാലിയില്‍ പങ്കെടുത്ത ശേഷം വാഹനത്തില്‍ കയറുന്നതിനിടെയാണ് മന്ത്രിയ്ക്ക് വെടിയേറ്റത്. നരോവാലിലെ കഞ്ചൂര്‍ ഗ്രാമത്തിലാണ് സംഭവം നടന്നത്.

വലത് തോളിനാണ് വെടിയേറ്റിരിക്കുന്നത്. എങ്കിലും പരിക്ക് ഗുരുതരമല്ലെന്ന് പാക് മാധ്യമങ്ങള്‍ വ്യക്തമാക്കുന്നു. സംഭവം നടന്ന ഉടന്‍ തന്നെ അഹ്‌സാന്‍ ഇഖ്ബാലിനെ ആശുപത്രിയില്‍ പ്രവേശിപ്പിച്ച് ശരീരത്തിൽ തുളഞ്ഞു കയറിയ ബുള്ളറ്റ് നീക്കി.

മന്ത്രിക്കുനേരെ വെടിയുതിര്‍ത്തയാളെ പോലീസ് കസ്റ്റഡിയിലെടുത്തു. പാക് മാധ്യമമായ ഡോണ്‍ റിപ്പോര്‍ട്ട് ചെയ്തത് പ്രകാരം 22 വയസുള്ളയാളാണ് അറസ്റ്റിലായിരിക്കുന്നത്. ഇയാളെ ചോദ്യം ചെയ്തുവരികയാണ്.