സോഷ്യൽ മീഡിയയിലെ ഇസ്ലാമോഫോബിക് കണ്ടന്‍റുകൾ നിരോധിക്കണം; സുക്കര്‍ബര്‍ഗിന് കത്തയച്ച് ഇമ്രാന്‍ ഖാന്‍

ഇസ്ലാമാബാദ്: സോഷ്യൽ നെറ്റ്‍വർക്കിൽ നിന്ന് ഇസ്ലാമോഫോബിക് ഉള്ളടക്കങ്ങള്‍ നിരോധിക്കണമെന്ന് പാക് പ്രധാനമന്ത്രി ഇമ്രാൻ ഖാൻ. ഫേസ്ബുക്ക് സിഇഒ മാർക്ക് സുക്കർബർഗിന് ഇക്കാര്യം ഉന്നയിച്ച് പ്രധാനമന്ത്രി കത്തയച്ചതായി സർക്കാരാണ് വ്യക്തമാക്കിയത്. ട്വിറ്റർ അക്കൗണ്ടിലൂടെ സർക്കാർ കത്ത് പുറത്ത് വിട്ടിട്ടും ഉണ്ട്.

Also Read : ഫ്രഞ്ച് പ്രസിഡന്‍റിന്‍റെ മനോനില പരിശോധിക്കേണ്ടതുണ്ട്; രൂക്ഷവിമർശനവുമായി തുർക്കി പ്രസിഡന്‍റ്

വളരുന്ന ഇസ്ലാമോഫോബിയ ലോകത്തേയാകെ തീവ്രവാദത്തിലേക്കും ആക്രമണത്തിലേക്കും നയിക്കുമെന്ന് കത്തില്‍ ഇമ്രാന്‍ ഖാന്‍ പറഞ്ഞു. ഹോളോകോസ്റ്റുമായി ബന്ധപ്പെട്ട ഉള്ളടക്കങ്ങളെ നിരോധിച്ചതിന് സമാനമായി ഇസ്ലാമോഫോബിയ പരത്തുന്ന ഉള്ളടക്കങ്ങളും നിരോധിക്കണമെന്നാണ് ഇമ്രാൻ ഖാൻ മാർക്ക് സുക്കർബർഗിന് അയച്ച കത്തിൽ പറയുന്നത്.

കഴിഞ്ഞദിവസം ഫ്രഞ്ച് പ്രസിഡന്‍റ് ഇമ്മാനുവല്‍ മാക്രോണിനെതിരെയും ഇതേ വിഷയത്തിൽ ഇമ്രാൻ ഖാൻ വിമർശനങ്ങൾ നടത്തിയിരുന്നു. പ്രവാചക നിന്ദ ആരോപിക്കപ്പെട്ട കാര്‍ട്ടൂണിന്‍റെ പേരില്‍ ഫ്രാന്‍സില്‍ ചരിത്രാധ്യാപകന്‍ കൊല്ലപ്പെട്ട സംഭവത്തിന് പിന്നാലെയായിരുന്നു ഇമ്രാൻ ഖാന്‍റെ വിമർശനങ്ങൾ. കൂടുതല്‍ ധ്രൂവീകരണവും പാര്‍ശ്വവത്കരണവും സൃഷ്ടിക്കുകയല്ല മാക്രോണ്‍ ഈ സമയത്ത് ചെയ്യേണ്ടതെന്നായിരുന്നു അദ്ദേഹം പറഞ്ഞത്.

Also Read : നേപ്പാളിലെ ഏഴു ജില്ലകളിൽ ചൈനീസ് കടന്നുകയറ്റം: കമ്മ്യൂണിസ്റ്റ് സര്‍ക്കാർ അനങ്ങുന്നില്ലെന്ന് ഇൻ്റലജിൻസ് മുന്നറിയിപ്പ്
അക്രമം അഴിച്ചുവിട്ട തീവ്രവാദികൾക്ക് നേരെ നടപടി എടുക്കുന്നതിന് പകരം മാക്രോണ്‍ ഇസ്ളാമിനെതിരെ തിരിഞ്ഞ് ഇസ്ലാമോഫോബിയ സൃഷ്ടിക്കുന്നത് നിര്‍ഭാഗ്യകരമാണെന്നും ട്വിറ്ററിലൂടെ ഇമ്രാന്‍ ഖാൻ പറഞ്ഞിരുന്നു.

മാക്രോണിന്‍റെ മുസ്ലീങ്ങൾക്കെതിരായ നയത്തിനെതിരെ രൂക്ഷവിമർശനവുമായി തുർക്കി പ്രസിഡന്‍റ് റിസെപ് തയ്യിപ് എർദോഗാനും കഴിഞ്ഞദിവസം രംഗത്തെത്തിയിരുന്നു. ഫ്രഞ്ച് പ്രസിഡന്‍റിന്‍റെ മനോനില പരിശോധിക്കേണ്ടതുണ്ടെന്നാണ് എർദോഗാൻ പറഞ്ഞത്.