അമേരിക്കയുമായുള്ള രഹസ്യാന്വേഷണ സഹകരണം പാക്കിസ്ഥാൻ നിര്‍ത്തി

ഇസ്ലാമാബാദ്: അമേരിക്കയുമായുള്ള രസഹ്യാന്വേഷണ - സൈനിക സഹകരണം താത്കാലികമായി അവസാനിപ്പിച്ചതായി പാക്കിസ്ഥാൻ. പാക്കിസ്ഥാനുള്ള സാമ്പത്തികസഹായം അമേരിക്ക മരവിപ്പിച്ചതിനു പിന്നാലെയാണ് തീരുമാനം. പാക്കിസ്ഥാൻ പ്രതിരോധ മന്ത്രി ഖുറം ദസ്തഗിറാണ് ഇക്കാര്യം അറിയിച്ചത്.

ഭീകരതയ്ക്കെതരിരായ യുദ്ധത്തിൽ പാക്കിസ്ഥാൻ നിറവേറ്റുമെന്ന് അദ്ദേഹം അറിയിച്ചു. സമാധാനം നിലനിര്‍ത്താനുള്ള ശ്രമങ്ങള്‍ തുടരും. പാക് സര്‍ക്കാരിന്‍റെ ഔദ്യോഗിക ട്വിറ്ററിലൂടെയായിരുന്നു അറിയിപ്പ്.

കാലങ്ങളായി സാമ്പത്തികസഹായം നല്‍കിയിട്ടും തീവ്രവാദികളെ സഹായിക്കുന്ന നയം തുടരുന്നു എന്നാരോപിച്ചാണ് പാക്കിസ്ഥാനുള്ള സാമ്പത്തികസഹായം അമേരിക്ക നിര്‍ത്തിവെച്ചിരിക്കുന്നത്. പാക്കിസ്ഥാന് 15 വര്‍ഷമായി 3300 കോടി ഡോളറിന്‍റെ സാമ്പത്തികസഹായം നല്‍കിയെങ്കിലും കള്ളവും വഞ്ചനയുമാണ് അമേരിക്കയ്ക്ക് തിരിച്ച് ലഭിച്ചെന്നായിരുന്നു യുഎസ് പ്രസിഡന്‍റ് ഡോണൾഡ് ട്രംപ് അറിയിച്ചത്. അതേസമയം ചര്‍ച്ചകള്‍ക്ക് തയ്യാറാകുന്ന പക്ഷം ഭാവിയിൽ സഹകരണം പുനരാരംഭിക്കുമെന്നും യുഎസ് അണ്ടര്‍ സെക്രട്ടറി സ്റ്റീവ് ഗോള്‍ഡ്സൺ പ്രസ്താവനയിൽ പറഞ്ഞു.