കുവൈത്ത് - ഫിലിപ്പീന്‍സ് തർക്കം മുറുകുന്നു

മനില: കുവൈത്തിലുള്ള തങ്ങളുടെ മുഴുവന്‍ പൗരന്മാരും എത്രയും പെട്ടെന്ന് രാജ്യത്തേക്ക് തിരിച്ച്‌ വരണമെന്ന് ഫിലിപ്പൈന്‍സ് പ്രസിഡന്റ് റോഡ്രിഗോ ഡുറ്റേര്‍ട്ട് ആവശ്യപ്പെട്ടു. കുവൈത്തിലുള്ള ഫിലിപ്പീന്‍ സ്വദേശികളെ അഭിസംബോധന ചെയ്യവെയാണ് എത്രയും വേഗം മടങ്ങി വരാന്‍ പ്രസിഡന്റ് സ്വദേശികളോട് ആവശ്യപ്പെട്ടത്. ഏകദേശം 2,60,000 ഫിലിപ്പീന്‍സ്‌കാരാണ് നിലവില്‍ കുവൈത്തിലുള്ളത് .കുവൈത്തിലേക്കുള്ള ഫിലിപ്പൈന്‍സ് പൗരന്മാരുടെ റിക്രൂട്ട്മെന്റ് നിറുത്തിവച്ച ഉത്തരവ് അനിശ്ചിത കാലത്തേക്ക് നീട്ടിയതായും അദ്ദേഹം വ്യക്തമാക്കി.

ഫിലിപ്പൈന്‍സ് സ്വദേശികളായ വീട്ടുജോലിക്കാരെ നയതന്ത്രകാര്യാലയത്തിലെ വാനില്‍ രക്ഷപ്പെടുത്തിയതോടെയാണ് ഇരുരാജ്യങ്ങളും തമ്മിലുള്ള ബന്ധം രൂക്ഷമായത്. ഫിലിപ്പൈന്‍ സ്വദേശിയായ വീട്ടുജോലിക്കാരിയെ സ്വദേശിയുടെ വീട്ടിലെ ഫ്രീസറില്‍ ഒരു വര്‍ഷത്തോളം കൊന്ന് സൂക്ഷിച്ചതും പ്രകോപനത്തിന് കാരണമായി. ഇതിനിടെ പ്രസിഡന്റ് റോഡ്രിഗോയും രാജ്യത്തെ ഫിലിപ്പൈന്‍സ് പ്രതിനിധി റെന്റോ വില്ലയും നടത്തിയ ചില പ്രസ്‌താവനകളും കുവൈത്തിനെയും പ്രകോപിപ്പിച്ചു.