വായിൽ കണ്ണീർ വാതക ഷെല്ലുമായി ഒരു യുവാവ്

ഗാസ : ജറുസലേം ദിനത്തോടനുബന്ധിച്ച് ആയിരത്തിലേറെ വരുന്ന പലസ്തീൻ സമരക്കാർ ഗാസ അതിർത്തിയിൽ കഴിഞ്ഞ ദിവസം പ്രക്ഷോഭം നടത്തിയിരുന്നു. സമരക്കാരെ നേരിടുന്നതിന് ഇസ്രായേൽ സൈന്യം കണ്ണീർവാതക ഷെല്ലുകൾ വർഷിച്ചു. ഇതിനിടയിലാണ് കല്ലേറ് നടത്തിയ പ്രക്ഷോഭകരെ നോക്കിനിൽക്കുകയായിരുന്ന ഹൈതം അബു സബല (23) യുടെ മുഖത്ത് കണ്ണീർവാതക ഷെല്‍ പതിച്ചത്.
വായിൽ നിന്നും മൂക്കിൽ നിന്നും പുക വമിപ്പിച്ച് കൊണ്ട് തൻറെ നേർക്ക് ഓടി വരുന്ന മനുഷ്യൻറെ ദൃശ്യം ഭയപ്പെടുത്തുന്നത് ആയിരുന്നെന്ന് റോയിട്ടേഴ്സ് ഫോട്ടോഗ്രാഫർ ഇബ്രാഹിം അബു മുസ്തഫ പറഞ്ഞു. ഷെല്ലിന്‍റെ ഭാഗം വായ്ക്കുള്ളിൽ കടന്ന്, വായിൽ നിന്നും മൂക്കിൽ നിന്നും കണ്ണീർ വാതകം പുറത്തേക്കു വമിക്കുന്ന നിലയിൽ പരക്കം പായുന്ന മനുഷ്യൻറെ ചിത്രം വാർത്താ ഏജൻസിയായ റോയിട്ടേഴ്സ് പുറത്തുവിട്ടു. ഇയാൾക്ക് മുഖത്തും നെഞ്ചത്തും മാരകമായി പരിക്കേറ്റിട്ടുമുണ്ട്.
കുഴഞ്ഞു നിലത്തുവീണ അബു സബലയെ വൈദ്യസംഘം ഉടൻ തന്നെ ആശുപത്രിയിൽ പ്രവേശിപ്പിക്കുകയും, ശസ്ത്രക്രിയയിലൂടെ ഷെല്ലിന്‍റെ ഭാഗം നീക്കം ചെയ്തതായും അധികൃതർ അറിയിച്ചു. ആശുപത്രിയിൽ ചികിത്സയിൽ തുടരുന്ന ഇയാൾ ഇപ്പോഴും ജീവനുവേണ്ടി പോരാടുകയാണ്. വെള്ളിയാഴ്ചയുണ്ടായ വെടിവെപ്പിൽ ഇവിടെ നാല് പലസ്തീൻ പ്രക്ഷോഭകർ കൊല്ലപ്പെട്ടിട്ടുമുണ്ട്.