ഖസാക്കിസ്ഥാനില്‍ 100 പേരുമായി പോയ യാത്രാ വിമാനം തകര്‍ന്നുവീണു; 15 മരണം

നുര്‍ സൂല്‍ത്താന്‍: ഖസാക്കിസ്ഥാനില്‍ 100 പേരുമായി പോയ യാത്രാ വിമാനം തകര്‍ന്നു വീണു. അല്‍മാട്ടി വിമാനത്താവളത്തിനു സമീപം ഇന്ന് രാവിലെ പുലര്‍ച്ചെ പ്രാദേശിക സമയം 7. 22 നാണ് ബെക് എയര്‍ എന്ന വിമാനം തകര്‍ന്നു വീണത്. വിമാനത്താവളത്തില്‍ നിന്നു പറന്നുയരുന്നതിനിടെ നിയന്ത്രണം നഷ്ടപ്പെട്ട വിമാനം സമീപത്തുള്ള ഇരുനില കെട്ടിടത്തിലേക്ക് വീഴുകയായിരുന്നു. രക്ഷാപ്രവര്‍ത്തനം പുരോഗമിക്കുകയാണ്. പതിനഞ്ച് പേരുടെ മരണം സ്ഥിരീകരിച്ചു. 66 പേര്‍ക്ക് പരിക്കേല്‍ക്കുകയും അതില്‍ 50 പേര്‍ ആശുപത്രിയില്‍ ചികിത്സയിലുമാണ്.

ഖസാക്കിസ്ഥാനിലെ ഏറ്റവും വലിയ നഗരമായ അല്‍മാട്ടിയില്‍ നിന്ന് തലസ്ഥാനമായ നുര്‍സുല്‍ത്താനിലേക്ക് പോകുന്ന വഴിയാണ് വിമാനം തകര്‍ന്നു വീണത്. 95 യാത്രക്കാരും 5 ജോലിക്കാരും ഉണ്ടായിരുന്നുവെന്ന് അധികൃതര്‍ പറഞ്ഞു. വിമാന തകരാര്‍ കണ്ടെത്താന്‍ ഒരു പ്രത്യേക കമ്മീഷനെ നിയമിക്കും. ഖസാക്കിസ്ഥാന്‍ പ്രസിഡന്റ് ക്വാസിം ജോമാര്‍ട്ട് ടോകെയെവ് വിമാനപകടത്തില്‍ മരിച്ചവരുടെ കുടുംബങ്ങള്‍ക്ക് അനുശോചനം രേഖപ്പെടുത്തി.


പ്രദേശത്ത് കനത്ത മഞ്ഞ് ആയിരുന്നെന്ന് വിമാനത്താവളത്തിലേക്ക് പോകുകയായിരുന്ന റോയിറ്റര്‍ വാര്‍ത്താ ഏജന്‍സിയുടെ റിപ്പോര്‍ട്ടര്‍ പറഞ്ഞു.