43 വര്‍ഷത്തെ സേവനത്തിനിടെ ഒരു അവധി പോലും എടുക്കാതെ മാതൃകയായി പൊലീസ് ഉദ്യോഗസ്ഥന്‍

റാസ് അല്‍ ഖായിമ: 43 വര്‍ഷത്തെ സേവനത്തിനിടെ ഒരു ദിവസം പോലും അവധി എടുക്കാതെ ഔദ്യോഗിക ജീവിതം പൂര്‍ത്തിയാക്കി റാസ് അല്‍ ഖായ്മയിലെ പൊലീസ് ഉദ്യോഗസ്ഥന്‍. റാക് പൊലീസിലെ ജനറല്‍ കമാന്‍ഡര്‍ അബ്ദുള്‍ റഹ്മാന്‍ ഒബൈദ് അല്‍ തുനാജിയാണ് ഈ നേട്ടത്തിന് ഉടമ.

ട്രാഫിക് പട്രോള്‍ വിഭാഗത്തിലായിരുന്നു അദ്ദേഹം സേവനം അനുഷ്ഠിച്ചിരുന്നത്. അദ്ദേഹം തൊഴില്‍സംബന്ധമായ കാര്യത്തിലും കൃത്യതയിലും എല്ലാവര്‍ക്കും മാതൃകയാണെന്ന് മേജര്‍ ജനറല്‍ അല്‍ നുവാമി പറഞ്ഞു. അദ്ദേഹത്തിന്റെ പ്രതിബദ്ധതയും അര്‍പ്പണബോധവും ഡിപ്പാര്‍ട്‌മെന്റിന്റെ സേവനങ്ങളുടെ വളര്‍ച്ചയ്ക്ക് പ്രധാന പങ്കു വഹിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു.

'ഞാന്‍ എന്റെ ജോലി മാത്രമാണ് ചെയ്തതെന്നും എല്ലാവരുടെയും പ്രോത്സാഹനത്തിനും പിന്തുണയ്ക്കും നന്ദി ഉണ്ടെന്നും' അല്‍ തുനാജി പറഞ്ഞു.