13 കാരിക്കുനേരെ പീഡന ശ്രമം; ഇന്ത്യൻ വൈദികന് ആറ് വർഷം തടവ്

ന്യൂയോർക്ക്: 13 കാരിയെ പീഡിപ്പിക്കാൻ ശ്രമിച്ച കേസിൽ മുൻ റോമൻ കത്തോലിക്കാ വൈദികന് ആറ് വർഷം തടവ്. ജോൺ പ്രവീൺ (38)നാണ് ശിക്ഷ വിധിച്ചിരിക്കുന്നത്. കഴിഞ്ഞ വർഷം സൌത്ത് ഡെകോടയിലെ റാപിഡ് സിറ്റി പള്ളിയിൽ വെച്ചാണ് പെൺകുട്ടിയെ പീഡിപ്പിക്കാൻ ശ്രമം നടന്നത്. സംഭവത്തിൽ പ്രവീൺ മാപ്പ് അപേക്ഷിച്ചിരുന്നു. ഒരിക്കലും ഇത്തരത്തിൽ ഒരു പ്രവർത്തി ആവർത്തിക്കില്ലെന്നും വൈദികൻ കോടതിയിൽ പറഞ്ഞിരുന്നു. പ്രോസിക്യൂട്ടർമാർ പ്രവീണിന് ഒരു വർഷത്തെ തടവിന് വിധിക്കണമെന്നാണ് ആവശ്യപ്പെട്ടത്. കുറ്റകൃത്യത്തിനുള്ള മതിയായ ശിക്ഷ ആകുന്നില്ലെന്നു വിലയിരുത്തിയ ജഡ്ജി ആറ് വർഷത്തെ ശിക്ഷയ്ക്ക് വിധിക്കുകയായിരുന്നു. മൂന്ന് വർഷത്തിനു ശേഷം പരോൾ അനുവദിക്കാനും ഉത്തരവിൽ പറയുന്നുണ്ട്.

മാപ്പപേക്ഷിച്ചതുകൊണ്ടാണ് ശിക്ഷയുടെ കാഠിന്യം കുറച്ചതെന്ന് കോടതി വ്യക്തമാക്കി. 16 വയസിനു താഴെയുള്ള പെൺകുട്ടികളെ ലൈംഗികാതിക്രമത്തിനു വിധേയമാക്കിയാലുള്ള വകുപ്പുകൾ പ്രകാരം 15 വർഷമാണ് ശിക്ഷ ലഭിക്കുക. 2017ലാണ് ജോൺ റാപിഡ് സിറ്റി രൂപതയിൽ 10 വർഷത്തെ അസൈൻമെന്റിന്റെ ഭാഗമായി എത്തിയത്.