ചൈനയുടെ കൊവിഡ് വാക്സിൻ: മനുഷ്യരിലെ പരീക്ഷണം വിജയമെന്ന് ഗവേഷകർ

ന്യൂഡൽഹി: കൊവിഡ്-19 വൈറസ് ബാധയ്ക്കെതിരെ ചൈനയിൽ വികസിപ്പിച്ച വാക്സിൻ്റെ ആദ്യഘട്ട പരീക്ഷണം വിജയമെന്ന് ഗവേഷകര്‍. 108 വോളൻ്റിയര്‍മാരില്‍ നടത്തിയ പരീക്ഷണത്തിൽ വാക്സിൻ സുരക്ഷിതമാണെന്നും കൊവിഡിനെതിരെ ശരീരത്തിൽ പ്രതിരോധശേഷിയുണ്ടാക്കാൻ കഴിയുന്നുണ്ടെന്നും ഗവേഷകര്‍ വ്യക്തമാക്കി. വൈറസിൻ്റെ ഫലപ്രാപ്തി ഉറപ്പിക്കാൻ കൂടുതൽ പരീക്ഷണങ്ങള്‍ ആവശ്യമാണെന്നാണ് ഗവേഷകര്‍ പറയുന്നത്.

വാക്സിൻ്റെ ഒന്നാം ഘട്ട ക്ലിനിക്കല്‍ പരീക്ഷണമാണ് വിജയിച്ചതെന്നാണ് ന്യൂയോര്‍ക്ക്ടൈംസ് റിപ്പോര്‍ട്ട് ചെയ്യുന്നത്.18 വയസ്സിനും 60 വയസ്സിനും ഇടയിൽ പ്രായമുള്ള 108 വോളന്‍റിയര്‍മാരിലാണ് വാക്സിൻ കുത്തിവെച്ചത്. ഒരു ഡോസ് വാക്സിൻ കുത്തിവെച്ച് രണ്ടാഴ്ചയ്ക്കകം തന്നെ ശരീരത്തിൽ പ്രതിരോധശേഷി വര്‍ധിപ്പിക്കുന്ന ടി സെല്ലുകള്‍ രൂപപ്പെട്ടതായും 28 ദിവസത്തിനു ശേഷം വൈറസിനെതിരെ പ്രവര്‍ത്തിക്കുന്ന പരമാവധി ആൻ്റിബോഡികള്‍ രൂപപ്പെട്ടതായും ഗവേഷകര്‍ അവകാശപ്പെട്ടു.

Also Read: കൊവിഡ്-19: വിദേശത്ത് പൊലിഞ്ഞത്149 മലയാളികള്‍; ഗള്‍ഫില്‍ മാത്രം 100 പേര്‍

എഡി5 എന്ന വൈറസിൽ കൊവിഡ്-19നെതിരെ ശരീരത്തിൽ പ്രതിരോധശഷി ഉണ്ടാക്കാൻ കെൽപ്പുള്ള ജനിതക ഘടകങ്ങള്‍ കൂടി ഇണക്കിച്ചേര്‍ത്താണ് വാക്സിൻ നിര്‍മിച്ചതെന്നാണ് റിപ്പോര്‍ട്ടിൽ പറയുന്നത്. ഇതോടു കൂടി കൊറോണ വൈറസ് ബാധയുണ്ടായാലും അതിനെ ചെറുക്കാൻ ശരീരത്തിനു കഴിയുന്നു. വിശദമായ പരീക്ഷണത്തിനു ശേഷം ആറുമാസത്തിനകം അന്തിമഫലം പ്രസിദ്ധീകരിക്കുമെന്നാണ് വാര്‍ത്താ ഏജൻസിയായ പിടിഐയുടെ റിപ്പോര്‍ട്ട്.


കൊവിഡ്-19നെതിരെ ഫലപ്രദമായ വാക്സിൻ വികസിപ്പിക്കാനായി ലോകത്ത് നൂറിലധികം പരീക്ഷണങ്ങളാണ് നടക്കുന്നത്. വരുന്ന ഒന്നര വര്‍ഷത്തിനുള്ളിൽ വൈറസ് ബാധയ്ക്കെതിരെ ഫലപ്രദമായ വാക്സിൻ വികസിപ്പിക്കാനാകുമെന്ന പ്രതീക്ഷയിലാണ് ശാസ്ത്രലോകം. നിലവില്‍ ഫലപ്രദമായ മരുന്നോ വാക്സിനോ കൊറോണ വൈറസ് ബാധയ്ക്കെതിരെ ലഭ്യമല്ല. ലോകത്ത് 25 ലക്ഷത്തിലധികം പേരെ ബാധിച്ച കൊവിഡ്-19 ഇതുവരെ 338000 പേരുടെ മരണത്തിന് ഇടയാക്കിയിട്ടുണ്ട്.

തങ്ങള്‍ വികസിപ്പിച്ച വാക്സിൻ്റെ പരീക്ഷണഫലം പ്രധാനപ്പെട്ടതാണെന്നാണ് വാക്സിൻ വികസിപ്പിച്ച ഗവേഷകസംഘം പറയുന്നത്. എഡി5 - എൻകോവ് വാക്സിൻ്റെ ഒരൊറ്റ ഡോസ് സ്വീകരിച്ചാൽ തന്നെ 14 ദിവസത്തിനുള്ളിൽ ശരീരത്തിൽ ടി സെല്ലുകളഉം വൈറസിനെതിരെ പ്രതിരോധ ശേഷി നല്‍കുന്ന ആൻ്റിബോഡികളും രൂപപ്പെടുമെന്നും അവര്‍ വ്യക്തമാക്കി.

അതേസമയം, 45 മുതൽ 60 വയസ്സുവരെ പ്രായമുള്ളവരിൽ രോഗപ്രതിരോധശേഷിയുണ്ടാക്കുമെന്നു മാത്രമേ തെളിഞ്ഞിട്ടുള്ളൂവെന്നും എത്ര കാലം പ്രതിരോധശേഷി ശരീരത്തിൽ നീണ്ടു നിൽക്കുമെന്ന് വ്യക്തമല്ലെന്നും ന്യൂയോര്‍ക്ക് ടൈംസ് റിപ്പോര്‍ട്ടിൽ പറയുന്നു.

മുൻപ് യുഎസിലെ മോഡേണ എന്ന കമ്പനി വികസിപ്പിച്ച വാക്സിനുംആദ്യഘട്ട പരീക്ഷണത്തിൽ സുരക്ഷിതവും ഫലപ്രദവുമാണെന്ന് കണ്ടെത്തിയിരുന്നു.