എന്തിനാ ചക്കരേ നീ അച്ചൻ പട്ടത്തിന് പോകുന്നേ? ഇറ്റലിയിലെ മൊഞ്ചൻ, മോഡലിങ് ഉപേക്ഷിച്ച് ആത്മീയ പാതയിലേക്ക്

അഭിനയത്തിലും നൃത്തത്തിലുമെല്ലാം കഴിവ് തെളിയിച്ച സന്‍റിനി കുട്ടിക്കാലം മുതൽ മോഡലിങ്ങിൽ സജീവമാണ്. എന്നാൽ ദൈവവിളി ലഭിച്ചതോടെ താൻ ഈ കരിയർ ഉപേക്ഷിക്കുകയാണെന്നാണ് യുവാവ് പറയുന്നത്. ഇൻസ്റ്റഗ്രമിൽ പോസ്റ്റ് ചെയ്ത വീഡിയോയിലൂടെയാണ് താൻ ഈ കരിയർ ഉപക്ഷേിക്കുകയാണെന്നും വൈദികനാകാൻ പോവുകയാണെന്നും സന്‍റിനി ലോകത്തോട് പറഞ്ഞത്.

മോഡലിങ്, അഭിനയം, നൃത്തം. ഇതെല്ലാം താൻ ഉപേക്ഷിക്കുകയാണ്. പക്ഷേ, എന്‍റെ എല്ലാ താത്പര്യങ്ങളും ഉപേക്ഷിക്കുന്നില്ല, ദൈവത്തിലേക്കുള്ള തന്‍റെ യാത്ര തുടരുമെന്നും വീഡിയോയ്ക്കൊപ്പമുള്ള കുറിപ്പിൽ യുവാവ് പറയുന്നു. തന്‍റെ മോഡലിങ് കരിയറിനിടയിലെ വിവിധ ചിത്രങ്ങളും പള്ളിയിൽ മുട്ടുകുത്തി നിൽക്കുന്നതിന്‍റെ ചിത്രങ്ങളും ഉൾപ്പെടുത്തിയ വീഡിയോയാണ് ഇതിനൊപ്പം 21കാരൻ പങ്കുവെച്ചിരിക്കുന്നത്.

'നിരവധി യുവാക്കളെ കാണാൻ കഴിഞ്ഞതോടെയാണ്. കുട്ടിക്കാലം തൊട്ട് മനസ്സിൽ കൊണ്ടു നടന്ന ചോദ്യങ്ങൾക്കുള്ള ഉത്തരം കണ്ടെത്താനുള്ള ആർജവമുണ്ടായത്. പലതരം ഭയങ്ങൾ ഉണ്ടായിരുന്നതിനാൽ ഉത്തരങ്ങൾ കണ്ടെത്താൻ മടിച്ചിരുന്നു'. സന്‍റിനി പറയുന്നു. കഴിഞ്ഞ വർഷങ്ങളിൽ കലയെ ചേർത്ത് നിർത്താൻ അനുവദിക്കുന്ന, അത്ഭുതപ്പെടുത്തുന്ന നിരവധി വ്യക്തികളെ കാണാൻ കഴിഞ്ഞിട്ടുണ്ട്. എന്‍റെ പാഷനുകൾ എന്‍റെ ജീവിതത്തിന്‍റെ ഭാഗമായതിനാൽ അവ ഉപേക്ഷിക്കില്ല. മറ്റൊരു രീതിയിൽ അവയെ സമീപിക്കാനാണ് തീരുമാനമെന്നും യുവാവ് കൂട്ടിച്ചേർത്തു.

ഇൻസ്റ്റഗ്രാം താരമായ സന്‍റിനിയുടെ വീഡിയോയ്ക്ക് താഴെ നിരവധി കമന്‍റുകളാണ് ലഭിച്ചിരിക്കുന്നത്. മോഡലിങ് ഉപേക്ഷിക്കുന്നതിലെ പരിഭവം ചിലർ പറയുമ്പോൾ യുവാവിന് ആശംസ നേരുകയാണ് മറ്റൊരു കൂട്ടർ. 'ദൈവത്തിന് കൂടെ നിങ്ങൾ നടക്കൂ. ഇതിലും മികച്ച കാര്യങ്ങൾ അവൻ നിങ്ങൾക്ക് കാട്ടിത്തരും. നിങ്ങളുടെ തീരുമാനം ഏറെ സന്തോഷിപ്പിക്കുന്നു' എന്നാണ് ഒരാൾ പറഞ്ഞത്. എനിക്കും ഇത്തരമൊരു ആഗ്രഹമുണ്ടെന്നും നിങ്ങൾക്ക് വേണ്ടി പ്രാർഥിക്കുമെന്നും പലരും കമന്‍റുകളിട്ടിട്ടുണ്ട്.

Photo Credit: edoardosantini/instagram