ആരോപണവുമായി പെൺകുട്ടി
ഓസ്ട്രേലിയൻ സ്വദേശിയായ കാതറിൻ ബാംപ്ടൺ (23) ആണ് വിർജിൻ ഓസ്ട്രേലിയ വിമാനക്കമ്പനിക്കെതിരെ ആരോപണവുമായി രംഗത്ത് എത്തിയത്. യത്രക്കാർക്ക് ഇരിക്കാൻ ഏർപ്പെടുത്തിയിരുന്ന പ്രത്യേക സ്ഥലത്ത് വിമാനം പുറപ്പെടുന്നതുമായി ബന്ധപ്പെട്ടുള്ള അറിയിപ്പിനായി കാത്തിരിക്കുകയായിരുന്നു ഞാൻ. ഈ സമയം ഒരു ജീവനക്കാരി തൻ്റെ അടുത്തെത്തി ഇക്കാര്യം പറഞ്ഞു. എൻ്റെ വസ്ത്രം പൈലറ്റിന് ഇഷ്ടമായില്ല. അതിനാൽ നിങ്ങളെ വിമാനത്തിൽ കയറ്റാൻ അവർ സമ്മതിക്കില്ല" - എന്നാണ് ആ ജീവനക്കാരി പറഞ്ഞതെന്ന് യുവതി വ്യക്തമാക്കുന്നു.
അപമാനിക്കപ്പെട്ടുവെന്ന് യുവതി
തൻ്റെ വസ്ത്രം മോശമാണെന്ന് പറഞ്ഞ് ജീവനക്കാരി തന്നെ അപമാനിച്ചു. ശബ്ദത്തിലാണ് അവർ സംസാരിച്ചത്. സമീപത്ത് ഇരുന്നവർ ഉൾപ്പെടെയുള്ളവർ ഈ സംഭാഷണം വ്യക്തമായി കേട്ടു. വിമാനത്തിൽ കയറണമെങ്കിൽ ധരിച്ചിരിക്കുന്ന വസ്ത്രം മാറ്റി മറ്റൊരു ടോപ്പ് ധരിക്കണമെന്ന് അവർ തന്നോട് ആവശ്യപ്പെട്ടു. നേർത്ത വസ്ത്രം ധരിച്ചിരിക്കുന്നതിനാൽ ശരീരം കാണാം എന്നായിരുന്നു അവർ പറഞ്ഞത്. ഈ സമയം അവിടെ ഉണ്ടായിരുന്ന എല്ലാവരും തന്നെ മാത്രം നോക്കുകയായിരുന്നു. കടുത്ത അപമാനമാണ് വിമാനത്താവളത്തിൽ നിന്ന് തനിക്കുണ്ടായത്. ഞെട്ടലും ലജ്ജയും ഉണ്ടാക്കുന്ന അനുഭവമായിരുന്നു ഇതെന്നും കാതറിൻ വ്യക്തമാക്കിയതായി ഓസ്ട്രേലിയൻ മാധ്യമങ്ങൾ റിപ്പോർട്ട് ചെയ്തു.
വിമാനത്തിൽ കയറിയത് ജാക്കറ്റ് ധരിച്ച്
ജീവനക്കാരിയുടെ നിർദേശത്തെ തുടർന്ന് വസ്ത്രത്തിന് മുകളിൽ ജാക്കറ്റ് ധരിച്ചാണ് വിമാനത്തിൽ കയറിയതെന്ന് കാതറിൽ പറഞ്ഞു. തൻ്റെ വസ്ത്രത്തിന് എന്താണ് കുഴപ്പമെന്ന് ചോദിച്ചപ്പോൾ ജീവനക്കാരി നൽകിയ മറുപടി അതിശയിപ്പിക്കുന്നതായിരുന്നു. മേനി പ്രദർശിപ്പിച്ച് എത്തുന്ന യാത്രക്കാരെ പൈലറ്റിന് ഇഷ്ടമല്ല എന്നാണ് അവർ പറഞ്ഞത്. ഈ സാഹചര്യത്തിൽ വിമാനക്കമ്പനിയും പൈലറ്റും തന്നോട് മാപ്പ് പറയണമെന്നും യുവതി ആവശ്യപ്പെട്ടു.
വിശദീകരണവുമായി വിമാനക്കമ്പനി
യുവതിയുടെ ആരോപണത്തിൽ അന്വേഷണം നടത്തുമെന്ന് വിർജിൻ ഓസ്ട്രേലിയ വക്താവ് അറിയിച്ചതായി 'ദ സൺ' റിപ്പോർട്ട് ചെയ്തു. " എന്താണ് സംഭവിച്ചതെന്ന് അന്വേഷിക്കുകയാണ്. ആരോപണം ഉന്നയിച്ച യുവതിയുമായി ബന്ധപ്പെടാൻ ശ്രമിച്ചു. വിമാനത്തിലെ യാത്രക്കാർക്കുള്ള ഡ്രസ് കോഡ് അടക്കമുള്ള വിവരങ്ങൾ ഞങ്ങൾ മുൻപും പങ്കുവച്ചിട്ടുണ്ട്. മറ്റ് വിമാനങ്ങളിലേത് പോലെ തന്നെ ഇവിടെയും വസ്ത്രധാരണത്തിൽ മാർഗനിർദേശങ്ങളുണ്ട്. നിലവിലെ സംഭവത്തെക്കുറിച്ച് പരാതി ലഭിച്ചിട്ടില്ലെങ്കിലും അന്വേഷിക്കുന്നുണ്ട്"- എന്നും അദ്ദേഹം വ്യക്തമാക്കി. ഹൈ വെയിസ്റ്റഡ് ട്രൗസറും ഹൈ നെക്കഡ് ഹാൾട്ടർ ടോപ്പുമാണ് കാതറിൻ ധരിച്ചിരുന്നത്.
മുൻപും സമാനമായ സംഭവം
വസ്ത്രധാരണത്തിൻ്റെ പേരിൽ വിമാനത്തിൽ നിന്നും മോശം അനുഭവപ്പെപ്പെട്ട പരാതി മുൻപും ഉയർന്നുവന്നിരുന്നു. സ്ത്രീകളാണ് ഇത്തരത്തിലുള്ള പരാതിയുമായി രംഗത്തുവരുന്നത്. 2019ൽ ഒരു സ്ത്രീയെ ഈസി ജെറ്റ് വിമാനത്തിൽ നിന്ന് പുറത്താക്കിയത് ചർച്ചയായിരുന്നു. യാത്രക്കാരുടെ വസ്ത്രധാരണത്തിൽ ഓരോ വിമാനക്കമ്പനികൾക്ക് അവരുടേതായ നിർദേശങ്ങളുണ്ട്. ഇത് സംബന്ധിച്ച മാർഗനിർദേശങ്ങൾ വിമാനക്കമ്പനികൾ പുറപ്പെടുവിക്കുകയും ചെയ്യുന്നുണ്ട്.