27 വർഷമായി സൂക്ഷിച്ചിരുന്ന ഭ്രൂണം
കഴിഞ്ഞ 27 വർഷമായി ശീതികരിച്ച് സൂക്ഷിച്ചിരുന്ന ഭ്രൂണത്തിൽ നിന്നാണ് മോളിയുടെ ജനനം. 1992 ലാണ് ഈ ഭ്രൂണം ശീതികരിച്ച് സൂക്ഷിച്ച് വച്ചത്. കഴിഞ്ഞ ഫെബ്രുവരി 10നാണ് ടിനയുടെ ഗർഭപാത്രത്തിലേക്ക് ഈ ഭ്രൂണം നിക്ഷേപിച്ചത്. അതുകൊണ്ട് തന്നെ മോളിയുടെ ജനനം പുതിയ റെക്കോർഡാണെന്നാണ് കരുതുന്നത്. മറികടന്നതാകട്ടെ തന്‍റെ മൂത്ത സഹോദരിയുടെ റെക്കോർഡ് ആണെന്നതും കൗതുകകരമാണ്.
Also Read : രണ്ട് ഭാര്യമാരെയും ഒരുമിച്ച് ഗർഭിണികളാക്കണം; യുവാവിന്റെ ആഗ്രഹത്തിന് പിന്നിൽ?
ടിന - ഗിബ്സൺ ദമ്പതികൾക്ക് ആദ്യ കുട്ടി ജനിച്ചതും സമാനമായ രീതിയിൽ
മോളിയുടെ മൂത്ത സഹോദരിയായ എമ്മ ഗിബ്സൺ ജനിച്ചതും സമാനമായ രീതിയിലാണ്. ശീതീകരിച്ച് സൂക്ഷിച്ചിരുന്ന ഭ്രൂണത്തിൽ നിന്നായിരുന്നു ഇവർ ആദ്യ കുട്ടിക്ക് ജന്മം നൽകിയത്. അതുകൊണ്ട് തന്നെ ദമ്പതികൾക്ക് ഈ റെക്കോർഡ് പുതിയൊരു കാര്യമല്ല. 'എമ്മയ്ക്ക് സമാനമായ രീതിയിലാണ് മോളിയും പിറന്നത്. രസകരമായ കാര്യം. നമ്മൾ മറ്റൊരു ലോക റെക്കോർഡ് കൂടി സ്വന്തമാക്കിയെന്നതാണ്.' 'ടിന ഗിബ്സൺ സിഎൻഎന്നിനോട് പ്രതികരിച്ചു.
എമ്മ സ്വന്തമാക്കിയത് 25 വയസ്സിന്‍റെ റെക്കോർഡ്
2017 നവംബറിലാണ് എമ്മ ഗിബ്സണിന്‍റെ ജനനം. 1992 മുതൽ ശീതീകരിച്ച് വച്ച ഭ്രൂണത്തിൽ നിന്നാണ് ജനനം എന്നത് കൊണ്ട് തന്നെ 25 വർഷത്തെ റെക്കോർഡായിരുന്നു ഈ കുട്ടി സ്വന്തമാക്കിയത്. എമ്മയുടെയും മോളിയുടെയും അമ്മയായ ടിനയ്ക്ക് ഇപ്പോൾ 29 വയസ് മാത്രമാണ് പ്രായം. വിവാഹം കഴിഞ്ഞ് വർഷങ്ങൾ കഴിഞ്ഞിട്ടും കുട്ടികളില്ലാത്ത വിഷമത്തിൽ കഴിയവെയാണ് ദമ്പതികൾ എംബ്രിയോ അഡാപ്ഷൻ എന്ന ചികിത്സാരീതിയെക്കുറിച്ച് അറിയുന്നത്. ഇതാണ് ഇവരുടെ ജീവിതത്തിൽ വഴിത്തിരിവായി മാറുന്നത്.
നിർദേശം മുന്നോട്ട് വയ്ക്കുന്നത് മാതാപിതാക്കൾ
വിവാഹം കഴിഞ്ഞ് കുട്ടികളില്ലാതെ വന്നതോടെ വന്ധ്യതാ ചികിത്സയിലായിരുന്നു ദമ്പതികൾ. ഇതോടെ പരമ്പരാഗത രീതിയിൽ കുട്ടികളെ ദത്തെടുക്കുന്നതിനെക്കുറിച്ചായിരുന്നു ഇരുവരും ചിന്തിച്ചത്. എന്നാൽ എംബ്രിയോ അഡാപ്ഷൻ സാധ്യതകൾ പരിശോധിക്കാൻ ഇവരോട് മാതാപിതാക്കൾ ആവശ്യപ്പെടുകയായിരുന്നു. ഇതാണ് ഇരുവരുടെയും ജീവിതത്തെ മാറ്റി മറിച്ചതും, രണ്ട് കുട്ടികളുടെ മാതാപിതാക്കളാക്കി മാറ്റിയതും.