'കര്‍ഷകസമരം ഇന്ത്യയും പാകിസ്ഥാനും തീര്‍ക്കട്ടെ'; ബ്രിട്ടീഷ് പ്രധാനമന്ത്രിയുടെ വിചിത്ര മറുപടി; കണ്ണ് മിഴിച്ച് എംപി

ഇന്ത്യയിലെ കര്‍ഷകസമരത്തെക്കുറിച്ചുള്ള ചോദ്യത്തിന് വിചിത്രമായ മറുപടി നല്‍കി ബ്രിട്ടീഷ് പ്രധാനമന്ത്രി ബോറിസ് ജോണ്‍സണ്‍. ബ്രിട്ടീഷ് പാര്‍ലമെന്‍റിലെ ഹൗസ് ഓഫ് കോമണ്‍സില്‍ നടന്ന ചോദ്യോത്തരവേളയിലാണ് സംഭവം.

ലേബര്‍ പാര്‍ട്ടി എംപിയും സിഖ് വംശജനുമായ തന്‍മന്‍ജീത് സിങ് ദേസിയാണ് ചോദ്യം ചോദിച്ചത്. ഇന്ത്യയിലെ കര്‍ഷകസമരത്തെ നരേന്ദ്ര മോദി സര്‍ക്കാര്‍ അടിച്ചമര്‍ത്തുകയാണ്. സമാധാനപരമായി പ്രതിഷേധിക്കാനുള്ള അവകാശം കര്‍ഷകര്‍ക്കുണ്ട്. ഇക്കാര്യത്തില്‍ തങ്ങള്‍ക്കുള്ള ആധി, ഇന്ത്യന്‍ പ്രധാനമന്ത്രിയോട് അറിയിക്കാന്‍ കഴിയില്ലേ എന്നായിരുന്നു ചോദ്യം.

ഇതിന് ബോറിസ് ജോണ്‍സണ്‍ നല്‍കിയ മറുപടി ഇങ്ങനെ,

തീര്‍ച്ചയായും ഞങ്ങളുടെ നിലപാട് അറിയാമല്ലോ. ഇന്ത്യയും പാകിസ്ഥാനും തമ്മിലുള്ള സംഘര്‍ഷത്തില്‍ കാര്യമായ ഉല്‍ക്കണ്ഠ ബ്രിട്ടനുമുണ്ട്. പക്ഷേ, ഇത് പ്രധാനമായും ആ രണ്ട് സര്‍ക്കാരുകള്‍ തമ്മിലാണ് പരിഹരിക്കേണ്ടത്. എംപി ഇത് മനസിലാക്കുമെന്നാണ് കരുതുന്നത്.

Also Read: കൊവിഡ് വാക്സിന് ശേഷം മദ്യം കഴിക്കരുത്

വിഷയം ബോറിസ് ജോണ്‍സണ്‍ തെറ്റായി മനസിലാക്കിയതാണെന്നാണ് പൊതുവ്യാഖ്യാനം. പക്ഷേ, കാര്‍ഷിക സമരം ചൈനയും പാകിസ്ഥാനും ചേര്‍ന്നാണ് പിന്തുണയ്‍ക്കുന്നതെന്ന് ബിജെപി അനുകൂലികള്‍ കഴിഞ്ഞദിവസം തന്നെ ആരോപിച്ചിരുന്നു.

മോദി സര്‍ക്കാര്‍ അവതരിപ്പിച്ച കര്‍ഷക ബില്‍ കോര്‍പ്പറേറ്റുകളെ സഹായിക്കുന്നതാണെന്ന് ആരോപിച്ച് പഞ്ചാബ് അടക്കമുള്ള മേഖലകളിലെ കര്‍ഷകര്‍ സമരത്തിലാണ്. ഡല്‍ഹിയിലേക്കുള്ള കര്‍ഷകസംഘടനകളുടെ മാര്‍ച്ച് തടഞ്ഞതിനെ തുടര്‍ന്ന് ഹരിയാന - ഡ‍ല്‍ഹി അതിര്‍ത്തിയില്‍ തമ്പടിച്ച് സമരം ചെയ്യുകയാണ് കര്‍ഷകര്‍.

പതിനഞ്ച് ദിവസമായി ഇവിടെ സമരം തുടരുകയാണ്. പലവട്ടം സര്‍ക്കാര്‍ ചര്‍ച്ച നടത്തിയെങ്കിലും ബില്‍ പൂര്‍ണമായും പിന്‍വലിക്കണമെന്ന ആവശ്യത്തില്‍ കര്‍ഷകര്‍ തുടരുകയാണ്.