ബ്രിട്ടനിലെ രാജകുടുംബം വീട്ടുജോലിക്കായി ആളെ തേടുന്നു; ശമ്പളം 18.5 ലക്ഷം രൂപ

ബ്രിട്ടനിലെ രാജകുടുംബം വീട്ടുജോലിക്കാരെ തേടുന്നതിനായി അപേക്ഷ ക്ഷണിച്ചു. രാജകുടുംബത്തിന്‍റെ ഔദ്യോഗിക വെബ്‌സൈറ്റ് വഴിയാണ് അപേക്ഷ ക്ഷണിച്ചിരിക്കുന്നത്. ജോലിയിൽ പ്രവേശിക്കുന്നവർക്ക് തുടക്കത്തില്‍ 19,140.09 പൗണ്ട് അതായാത് ഇന്ത്യയിലെ 18.5 ലക്ഷം രൂപയായിരിക്കും ശമ്പളമായി ലഭിക്കുന്നത്
ജോലിക്കായി തെരെഞ്ഞെടുത്ത് കഴിഞ്ഞാല്‍ കൊട്ടാരത്തിൽ തന്നെ താമസിക്കണം. ജോലിക്ക് എത്തുന്നവർക്ക് ആവശ്യമായ പരിശീലനം കൊട്ടാരത്തില്‍ നിന്ന് ലഭിക്കും. കൊട്ടാരത്തിനകത്തെ കാര്യങ്ങള്‍ എല്ലാം വൃത്തിയായി സൂക്ഷിക്കുക എന്നതാണ് പ്രധാന ജോലി

ആദ്യം13 മാസം പരിശീലനം ലഭിക്കും. കൊട്ടാരത്തിന്‍റെ കാര്യങ്ങള്‍ അറിയാന്‍ വേണ്ടിയാണ് പരിശീലനം നൽകുന്നത്. തുടർന്ന് മുഴുവൻ സമയ ജോലിക്കാരായി നിയമിക്കും. വീട്ടുജോലി ചെയ്ത് പരിചയമുള്ളവർക്ക് മുൻഗണയുണ്ട്. ജോലിക്കായി അപേക്ഷിക്കുന്നവർക്ക് ഇംഗ്ലീഷിലും കണക്കിലും യോഗ്യത വേണം. വിൻഡ്‌സർ കാസിലിലാണ് ജോലിക്ക് നിയമിക്കുന്നത് എന്നാല്‍ ചിലപ്പോള്‍ ബക്കിംഗ്ഹാം കൊട്ടാരത്തിലും ജോലിക്കായി പോകേണ്ടി വരും.

Also Read: അധ്യാപകൻ്റെ തലവെട്ട്: 'ഫ്രാൻസ് മുസ്ലീങ്ങളുടെ ശത്രു'; ബംഗ്ലാദേശിൽ ആയിരങ്ങള്‍ പങ്കെടുത്ത പ്രതിഷേധം

ജോലിക്കായി എത്തുന്നവര്‍ കൊട്ടാരത്തില്‍ തന്നെയായിരിക്കും താമസിക്കുക. കൂടാതെ ഒരു വർഷത്തിൽ 33 ദിവസം അവധി ലഭിക്കും. കൊട്ടാരത്തിന് അകത്തെ എല്ലാ സുഖസൗകര്യങ്ങളും അനുഭവിച്ച് രാജകീയമായി ജീവിക്കാന്‍ സാധിക്കും. എന്നാൽ ജോലി കിട്ടുക അത്ര എളുപ്പമുള്ള കാര്യമല്ലെന്ന് രാജകുടുംബത്തിലേക്ക് ജോലിക്കായി ആളെ റിക്രൂട്ട് ചെയ്യുന്ന സിൽവർ സ്വാൻ റിക്രൂട്ട്മെന്റ് ഏജൻസി പറയുന്നു.
രാജകുടുംബത്തിന് അനുയോജ്യമായ അവരുടെ രീതികളോട് പൊരുത്തപ്പെടാന്‍ കഴിയുന്ന ഒരാളെ കണ്ടെത്തണം. കൊട്ടരത്തിലെ കാര്യങ്ങള്‍ എല്ലാം വ്യത്യസ്ഥമാണ്. യോഗ്യതയേക്കാൾ പരിശീലനത്തിന് ആണ് കൂടുതല്‍ പ്രാധാന്യം നൽകുന്നതെന്നും സിൽവർ സ്വാൻ റിക്രൂട്ട്മെന്റ് ഏജൻസി എം.ഡി സ്മിത്ത് പറഞ്ഞതായി ന്യൂസ് 18 റിപ്പോര്‍ട്ട് ചെയ്യുന്നു. ജോലിക്കായി ഒക്ടോബർ 28വരെ അപേക്ഷിക്കാം.