'കർഷകർക്കൊപ്പം തന്നെ'; ഇന്ത്യ പ്രതിഷേധിച്ചിട്ടും നിലപാടിൽ ഉറച്ച് ജസ്റ്റിൻ ട്രൂഡോ

ന്യൂഡൽഹി: കർഷക സമരത്തെ പിന്തുണച്ചുള്ള നിലപാടിലുറച്ച് കനേഡിയൻ പ്രധാനമന്ത്രി ജസ്റ്റിൻ ട്രൂഡോ. ഇന്ത്യയിലെ കനേഡിയൻ ഹൈക്കമ്മിഷണറെ വിളിച്ചുവരുത്തി ഇന്ത്യ പ്രതിഷേധം അറിയിച്ചിട്ടും തന്‍റെ നിലപാടിൽ ഉറച്ച് നിൽക്കുകയാണ് ട്രൂഡോയെന്ന് ദേശീയ മാധ്യമമായ ന്യൂസ്18യാണ് റിപ്പോർട്ട് ചെയ്തത്. ഇന്നലെയായിരുന്നു ഹൈക്കമ്മിഷണറെ വിളിച്ച് വരുത്തി ഇന്ത്യ പ്രതിഷേധം അറിയിച്ചത്.

ഇത്തരം പ്രവർത്തികൾ തുടരുന്നത് ഇന്ത്യയും കാനഡയും തമ്മിലുള്ള ബന്ധത്തിൽ ഗുരുതര പ്രത്യാഘാതം ഉണ്ടാക്കുമെന്നായിരുന്നു കനേഡിയൻ ഹൈക്കമ്മിഷണറെ വിളിച്ച് വരുത്തിയ വിദേശകാര്യമന്ത്രാലയം പറഞ്ഞത്. ഇത്തരം അഭിപ്രായപ്രകടനങ്ങൾ നമ്മുടെ ആഭ്യന്തര കാര്യങ്ങളിലെ അസ്വീകാര്യമായ ഇടപെടലാണ്. പരാമർശങ്ങൾ തുടരുന്നത് ഉഭയകക്ഷി ബന്ധത്തെ ബാധിക്കുമെന്നും വിദേശകാര്യമന്ത്രാലയം പറഞ്ഞിരുന്നു.

Also Read : ജസ്റ്റിൻ ട്രൂഡോയുടെ പ്രസ്താവന; ഇന്ത്യ കനേഡിയൻ ഹൈക്കമ്മീഷണറെ വിളിച്ചുവരുത്തി

ഇന്ത്യയുടെ മുന്നറിയിപ്പിനെക്കുറിച്ച് പ്രതികരിച്ച കനേഡിയൻ പ്രധാനമന്ത്രി 'സമാധാനമായ പ്രതിഷേധങ്ങൾക്കും മനുഷ്യാവകാശങ്ങൾക്കും' ഒപ്പം തന്നെയാണ് കാനഡ എപ്പോഴും നിലകൊള്ളുക എന്നാണ് ആവർത്തിച്ചത്. അതേസമയം നരേന്ദ്ര മോദി സർക്കാരും കർഷകരും തമ്മിൽ നടക്കുന്ന ചർച്ചകളെയും അദ്ദേഹം സ്വാഗതം ചെയ്തിട്ടുണ്ട്.

കര്‍ഷക പ്രതിഷേധത്തെക്കുറിച്ച് ഇന്ത്യയില്‍ നിന്നുവരുന്ന വാര്‍ത്തകള്‍ ആശങ്കാജനകമാണെന്നും അവകാശങ്ങള്‍ക്ക് വേണ്ടി സമാധാനപരമായി പോരാടുന്ന കര്‍ഷകര്‍ക്കൊപ്പമാണ് കാനഡ നിലകൊള്ളുന്നതെന്നുമായിരുന്നു കര്‍ഷകസമരത്തെ പിന്തുണച്ച് ട്രൂഡോ ആദ്യം നടത്തിയ പ്രസ്താവന. ഇതിനെതിരെയാണ് ഇന്ത്യ പ്രതിഷേധം അറിയിച്ചത്.

Also Read : പ്ലസ് ടു വിദ്യാർഥികൾ ക്ലാസ് മുറിയിൽവെച്ച് 'വിവാഹിതരായി'; നടപടിയെടുത്ത് പോലീസ്

കനേഡിയൻ പ്രധാനമന്ത്രി ജസ്റ്റിൻ ട്രൂഡോയ്ക്ക് പുറമെ മന്ത്രിമാരും സമാനമായ അഭിപ്രായപ്രകടനങ്ങൾ നേരത്തെ നടത്തിയിരുന്നു. രാജ്യത്ത് നടക്കുന്ന കര്‍ഷക സമരത്തെ പിന്തുണച്ച് സംസാരിച്ച ആദ്യ അന്താരാഷ്ട്ര നേതാവും ട്രൂഡോയായിരുന്നു.