'ചെയ്യേണ്ടത് ചെയ്യൂ'; ഒടുക്കം ബൈഡന് അധികാര കൈമാറ്റത്തിന് തയ്യാറായി ട്രംപ്

പ്രസിഡന്റ് തെരഞ്ഞെടുപ്പിൽ പെൻസിൽവേനിയ സ്റ്റേറ്റിൽ തട്ടിപ്പ് നടന്നതായി ആരോപിച്ച് ട്രംപ് സമര്‍പ്പിച്ച ഹർജി കൂടി കഴിഞ്ഞ ദിവസം കോടതി തള്ളിയിരുന്നു. അടിസ്ഥാനമില്ലാത്ത ആരോപണങ്ങളും യോഗ്യമല്ലാത്ത നിയമപരമായ വാദഗതികളുമാണ് ഹര്‍ജിയിലുള്ളത് എന്ന് ജഡ്ജ് കണ്ടെത്തുകയായിരുന്നു. ഇത്തരത്തിൽ നിരവധി ആരോപണങ്ങളാണ് ട്രംപ് ആദ്യം മുതൽക്കെ ഉന്നയിച്ചിരുന്നത്.

ജനറൽ സര്‍വീസ് അഡ്മിനിസ്ട്രേഷന് ഇത് സംബന്ധിച്ച് ട്രംപ് നിര്‍ദ്ദേശം നൽകി ട്വീറ്റും പുറത്തുവിട്ടിരുന്നു. 'ചെയ്യേണ്ടത് ചെയ്യൂ' എന്ന് അദ്ദേഹം അറിയിച്ചതായാണ് ജനറൽ സർവീസസ് അഡ്മിനിസ്ട്രേഷൻ ഏജൻസിയുടെ തലവൻ എമിലി മർഫി പറഞ്ഞത്. നവംബര്‍ മൂന്നിന് നടന്ന തെരഞ്ഞെടുപ്പിൽ ബൈഡന് വിജയമുണ്ടായെങ്കിലും അത് അംഗീകരിക്കുവാന്‍ ട്രംപ് തയ്യാറായിരുന്നില്ല. തുടര്‍ച്ചയായി തട്ടിപ്പാണെന്ന ആരോപണം ഉന്നയിക്കുകയായിരുന്നു.

അധികാര കൈമാറ്റ നടപടിക‌്രമങ്ങൾക്ക് ബൈഡന്റെ ഓഫീസിന് 63 ലക്ഷം ഡോളര്‍ അനുവദിച്ചു. മിഷിഗണ്‍ സ്റ്റേറ്റിലെ ബൈഡന്റെ വിജയത്തോടെയാണ് ട്രംപിന്റെ മനംമാറ്റമുണ്ടായിരിക്കുന്നത്. അധികാരകൈമാറ്റത്തിനുള്ള ട്രംപിന്റെ നടപടിയെ ബൈഡനും സംഘവും സ്വാഗതം ചെയ്യുകയും ചെയ്തു. ജനുവരി 20നാണ് 46ാമത് അമേരിക്കൻ പ്രസിഡന്റായി ജോ ബൈഡൻ അധികാരം ഏറ്റെടുക്കുക.

വരാനിരിക്കുന്ന ഭരണകൂടത്തിന് സുഗമവും സമാധാനപരവുമായ അധികാര കൈമാറ്റം നടത്താൻ ആവശ്യമായ വിഭവങ്ങളും പിന്തുണയും നൽകുമെന്ന് പ്രസ്താവനയിൽ ബൈഡന്റെ സംഘം വ്യക്തമാക്കി.

നമ്മുടെ തീരുമാനം മഹാമാരി നിയന്ത്രണത്തിലാക്കുകയും നമ്മുടെ സമ്പദ്‌വ്യവസ്ഥയെ തിരികെ കൊണ്ടുപോകുകയും ചെയ്യുന്നതുൾപ്പെടെയുള്ള നമ്മുടെ രാഷ്ട്രം നേരിടുന്ന വെല്ലുവിളികളെ നേരിടാൻ ആവശ്യമായ ഒരു ഘട്ടമാണ്. ഈ അന്തിമ തീരുമാനം ഫെഡറൽ ഏജൻസികളുമായി ഔപചാരികമായി അധികാര കൈമാറ്റപ്രക്രിയ ആരംഭിക്കുന്നതിനുള്ള കൃത്യമായ ഭരണപരമായ നടപടിയാണ് എന്നും ബൈഡന്റെ സംഘം പ്രതികരിച്ചു.